ចម្លែកណាស់ រដ្ឋអាមេរិកមិនមែនជាផ្នែកនៃសន្ធិសញ្ញាការពារទៅវិញទៅមករបស់ណាតូទេ

ចែករំលែក៖

រដ្ឋពិសេសរបស់អាមេរិកនេះមិនស្ថិតនៅក្នុង “ឆត្រសន្តិសុខ” របស់ណាតូទេ។ អ្នកជំនាញខ្លះនិយាយថា ត្រូវការការផ្លាស់ប្តូរ។
ប្រទេសស៊ុយអែតបានក្លាយជាសមាជិកថ្មីបំផុតរបស់ណាតូកាលពីដើមខែនេះ ដោយបានចូលរួមជាមួយប្រទេសចំនួន 31 ក្នុងសម្ព័ន្ធភាពសន្តិសុខ រួមទាំងសហរដ្ឋអាមេរិកផងដែរ។ ប៉ុន្តែសម្រាប់សហរដ្ឋអាមេរិក ដោយសារភាពខុសគ្នាខាងភូមិសាស្ត្រ និងប្រវត្តិសាស្ត្រ រដ្ឋហាវ៉ៃមិនមែនជាផ្នែកបច្ចេកទេសនៃសន្ធិសញ្ញាណាតូទេ។ មានន័យថា រដ្ឋនេះមិនស្ថិតនៅក្រោមការការពាររបស់ណាតូឡើយ។
យោងតាម CNN នៅថ្ងៃទី 30 ខែមីនា ប្រសិនបើកងកម្លាំងបរទេសវាយប្រហារកោះហាវ៉ៃ ដូចជាមូលដ្ឋានទ័ពជើងទឹកអាមេរិកនៅកំពង់ផែ Pearl Harbor ឬទីស្នាក់ការកណ្តាលនៃបញ្ជាការឥណ្ឌូប៉ាស៊ីហ្វិកនៅភាគពាយព្យនៃទីក្រុង Honolulu នោះ សមាជិកណាតូនឹងមិនមានកាតព្វកិច្ចក្នុងការ ពង្រឹងការការពារកោះហាវ៉ៃនោះឡើយ។
លោក David Santoro ប្រធាននៃវេទិកា Pacific Forum នៅទីក្រុង Honolulu បាននិយាយថា “វាជារឿងចម្លែកបំផុត” ដោយកត់សម្គាល់ថា សូម្បីតែជនជាតិហាវ៉ៃភាគច្រើនក៏មិនដឹងថា រដ្ឋនេះមិនស្ថិតនៅក្រោមការការពារពីណាតូ។ លោក Santoro បាននិយាយថា “មនុស្សមានទំនោរគិតថាកោះហាវ៉ៃជាផ្នែកមួយនៃសហរដ្ឋអាមេរិក ហើយដូច្នេះវាត្រូវបានការពារដោយអង្គការណាតូ” ។
ហាវ៉ៃមានទីតាំងនៅមហាសមុទ្រប៉ាស៊ីហ្វិក ហើយមិនដូចរដ្ឋកាលីហ្វ័រនីញ៉ា ខូឡូរ៉ាដូ ឬអាឡាស្កា រដ្ឋទី 50 នេះមិនមែនជាផ្នែកនៃទ្វីបអាមេរិកទេ។ លោក Santoro បានបញ្ជាក់ថា៖ «ទឡ្ហីករណ៍សម្រាប់សន្ធិសញ្ញាការពារទៅវិញទៅមករបស់ណាតូ ដែលមិនរាប់បញ្ចូលកោះហាវ៉ៃ គឺគ្រាន់តែថាវាមិនមែនជាផ្នែកនៃអាមេរិកខាងជើងនោះទេ។
ការលើកលែងនោះត្រូវបានសរសេរនៅក្នុងសន្ធិសញ្ញាវ៉ាស៊ីនតោន ដែលជាឯកសារដែលបានបង្កើតអង្គការណាតូក្នុងឆ្នាំ 1949 មួយទសវត្សរ៍មុនពេលហាវ៉ៃក្លាយជារដ្ឋរបស់សហរដ្ឋអាមេរិក៕ ដោយ៖ ធីរីណា