សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោកឧត្តមសេនីយ៍ទោ ហេង រតនា ស្នងការរងនគរបាលរាជធានីភ្នំពេញ បានបញ្ចេញព័ត៌មានពាក់ព័ន្ធនឹងម្ចាស់រថយន្តម្នាក់ ដែលត្រូវបានរាយការណ៍ថា បានបើករថយន្តបុកក្មេងស្រីម្នាក់ បណ្តាលឲ្យរងរបួសបាក់ដៃ។
ជុំវិញករណីនេះ លោកឧត្តមសេនីយ៍ទោ ហេង រតនា បានអំពាវនាវដោយផ្ទាល់ដល់សាមីខ្លួន សូមចូលមកជួបសមត្ថកិច្ច និងដោះស្រាយបញ្ហាតាមនីតិវិធីច្បាប់ កុំគេចវេសពីការទទួលខុសត្រូវ។
លោកស្នងការរងបានបញ្ជាក់យ៉ាងច្បាស់ថា៖ «សូមសាមីខ្លួនចូលមកដោយផ្ទាល់ កុំគេចខ្លួន។ ជាប្រុស កុំឲ្យម្តាយមកដោះស្រាយជំនួស ចូលមកដោះស្រាយតាម ច្បាប់ចរាចរណ៍»។
ការលើកឡើងនេះ ត្រូវបានមហាជនចាត់ទុកថា ជាសារដ៏ម៉ឺងម៉ាត់មួយ ដើម្បីឲ្យអ្នកបើកបរគ្រប់រូបមានស្មារតីទទួលខុសត្រូវ នៅពេលមានគ្រោះថ្នាក់ចរាចរណ៍ ជាពិសេសនៅពេលបង្កឲ្យអ្នកដទៃរងរបួស។
ជាមួយគ្នានេះ ករណីខាងលើក៏ជាការរំលឹកដល់អ្នកប្រើប្រាស់ផ្លូវទាំងអស់ ឲ្យបង្កើនការប្រុងប្រយ័ត្ន គោរពច្បាប់ចរាចរណ៍ និងមិនត្រូវគេចវេសពីការទទួលខុសត្រូវ ប្រសិនបើខ្លួនមានជាប់ពាក់ព័ន្ធនឹងគ្រោះថ្នាក់។
ច្បាប់គឺសម្រាប់មនុស្សគ្រប់រូប ហើយការទទួលខុសត្រូវចំពោះទង្វើរបស់ខ្លួន គឺជាកាតព្វកិច្ចដែលមិនអាចផ្ទេរឲ្យអ្នកដទៃជំនួសបានឡើយ៕
