សារព័ត៌មាន នគរវត្ត តែងតែនាំមុខគេជានិច្ច
ក្នុងនាមប្រជាពលរដ្ឋ រស់នៅខេត្តបាត់ដំបង ចាប់អារម្មណ៍ថា មួយរយៈពេលនេះ សកម្មភាពចោរគាស់ផ្ទះបានកើតឡើងជាញឹកញាប់នៅខេត្តបាត់ដំបង មិនថាតែនៅជាយក្រុងបាត់ដំបង ឬនៅតាមបណ្តាស្រុកនោះឡើយ ។ ការកើតមាននូវអំពើចោរកម្មទាំងថ្ងៃជាញឹកញាប់នេះ បណ្តាលមកពីការរីករាលដាលនៃវង់ល្បែងស៊ីសង និងបញ្ហាគ្រឿងញៀន ។ ជាមួយនោះ គេសង្កេតឃើញថា អាជ្ញាធរមានសមត្ថកិច្ចខេត្តបាត់ដំបង គ្មានសមត្ថភាពគ្រប់គ្រាន់ក្នុងការការពារសន្តិសុខជូនប្រជាពលរដ្ឋ នៅតាមមូលដ្ឋាននោះឡើយ ។
មិនថាតែនៅជាយក្រុងបាត់ដំបងនោះទេ ដែលមានករណីហ្វូងចោរចូលគាស់ផ្ទះប្រជាពលរដ្ឋទាំងកណ្តាលថ្ងៃនោះ សូម្បីតែនៅតាមបណ្តាស្រុកឆ្ងាយៗ ក៏មានចោរគាស់ផ្ទះញឹកញាប់ដែរ ។ គេកម្រឃើញអាជ្ញាធរមានសមត្ថកិច្ចបំបែកសំណុំរឿង ឬចាប់បានក្រុមចោរគាស់ផ្ទះនោះណាស់ ។ ប្រការនេះធ្វើឲ្យប្រជាពលរដ្ឋនៅក្នុងសហគមន៍ព្រួយបារម្ភជាខ្លាំងអំពីបញ្ហាករណីចោរលួចចោរប្លន់នេះ ។ នៅពេលដែលរឿងដដែលៗបានកើតឡើងជាញឹកញាប់ ហើយអាជ្ញាធរមានសមត្ថកិច្ចមិនអាចសម្រាលក្តីព្រួយបារម្ភបាននោះ ប្រជាពលរដ្ឋយល់ថា អគ្គស្នងការនគរបាលជាតិ គួរតែជួយសម្រួលបញ្ហានេះផង ។
ក្នុងនាមប្រជាពលរដ្ឋនៅទីរួមខេត្តបាត់ដំបង ខ្ញុំបាទយល់ឃើញថា អាជ្ញាធរមានសមត្ថកិច្ចមិនបានផ្តល់ភាពកក់ក្តៅជូនប្រជាពលរដ្ឋនោះឡើយ ផ្ទុយទៅវិញ ក្រៅតែអំពីបញ្ហាចោរគាស់ផ្ទះកើតមានស្ទើរជារៀងរាល់ថ្ងៃនោះ វង់ល្បែងស៊ីសងច្រើនប្រភេទមានទាំងកាស៊ីណូស្របច្បាប់ និងមិនស្របច្បាប់ កើតឡើងព្រោងព្រាត ទាំងនៅកណ្តាលក្រុងបាត់ដំបង និងនៅតាមព្រំដែនថៃ ។ ការរីករាលដាលនៃការប្រើប្រាស់គ្រឿងញៀន ក៏ជាកង្វល់មួយរបស់ប្រជាពលរដ្ឋផងដែរ ។ បញ្ហាល្បែងស៊ីសង និងគ្រឿងញៀន ក៏មិនត្រូវបានអាជ្ញាធរមានសមត្ថកិច្ចចាត់វិធានការបង្ក្រាបឲ្យអស់ពីសមត្ថភាពនោះដែរ។ ដូច្នេះ ប្រជាពលរដ្ឋនៅខេត្តបាត់ដំបងនឹងបន្តរស់នៅក្នុងភាពភ័យខ្លាចជារហូតទៅ ៕ ប្រជាពលរដ្ឋម្នាក់
