សារព័ត៌មាន នគរវត្ត តែងតែនាំមុខគេជានិច្ច
តាមការកត់សម្គាល់របស់ខ្ញុំបាទ សង្កេតឃើញថា អ្វីដែលអគ្គនាយកដ្ឋានកាំកុងត្រូលរកឃើញក្រុមហ៊ុនប្រេងដែលរកស៊ីខ្វះសុច្ចរិតភាពច្រើនជាងគេនោះ គឺក្រុមហ៊ុនប្រេងឥន្ធនៈតេលា ។ ជារឿយៗ នៅពេលដែលខាងកាំកុងត្រូលចុះពិនិត្យតាមស្ថានីយលក់ប្រេងនានានោះ គេរកឃើញស្ថានីយប្រេងតេលាភាគច្រើនជាងគេដែលលក់ប្រេងមិនគ្រប់ចំណុះ និងមានលាយឡំដោយការបន្លំគុណភាព ។ គេមិនដឹងថា វាជាគោលការណ៍របស់ក្រុមហ៊ុនកម្ពុជាតេលា ឬក៏ម្ចាស់ស្ថានីយប្រេងទាំងនោះមានគំនិតទុច្ចរឹតដោយខ្លួនឯង ។ ប៉ុន្តែថា បើវាជាគំនិតទុច្ចរឹតរបស់ម្ចាស់ស្ថានីយ វាក៏គួរតែមានការរកឃើញស្ថានីយប្រេងខ្លះ ដែលមិនមែនជាប្រេងរបស់ក្រុមហ៊ុនកម្ពុជាតេលានោះផង ។
យ៉ាងដូច្នេះវាគ្រាន់តែជាការកត់សម្គាល់ប៉ុណ្ណោះ ពីព្រោះក្រុមហ៊ុនផ្សេងៗទៀត ហាក់ដូចជាមិនឃើញ មានកំហុសឆ្គងញឹកញាប់ទាំងការលួចបន្លំគុណភាព និងលួចបន្លំចំណុះនោះទេ ។ មិនថានៅរាជធានីភ្នំពេញ ឬនៅតាមផ្លូវជាតិបណ្តាខេត្តនោះទេ សមត្ថកិច្ចកាំកុងត្រូល រកឃើញស្ថានីយប្រេងឥន្ធនៈរបស់ក្រុមហ៊ុនកម្ពុជាតេលា ភាគច្រើនជាងគេដែលលក់ប្រេងមិនគ្រប់ចំណុះ និងឆ្លៀតបន្លំគុណភាព ។ ប្រសិនជាការកត់សម្គាល់របស់ខ្ញុំបាទមិនខុសឆ្គងទេនោះ វាគួរតែថ្នាក់ដឹកនាំក្រសួងពាណិជ្ជកម្ម ហៅថៅកែក្រុមហ៊ុនកម្ពុជាតេលា ប្រាប់គាត់ម្តងទៅ ។ ពីព្រោះប្រជាពលរដ្ឋមិនប្រាថ្នាចង់ឃើញ ឬចង់បានប្រេងដែលបន្លំគុណភាព ឬលួចចំណុះនោះទេ ។ អតិថិជនជាច្រើន អាចនឹងត្រូវបាត់បង់ទំនុកចិត្តជាបន្តបន្ទាប់ទៅលើស្ថានីយប្រេង របស់ក្រុមហ៊ុនកម្ពុជាតេលា ។
សមត្ថកិច្ចកាំកុងត្រូលនៅតែបន្តចុះប្រតិបត្តិការនៅតាមស្ថានីយប្រេង មិនថាតែក្នុងរាជធានីភ្នំពេញ ឬតាមបណ្តាខេត្តនោះឡើយ ដើម្បីឲ្យដឹងថា តើពួកគេប្រកបរបររកស៊ីដោយសុច្ចរឹតឬទេ ។ ប៉ុន្តែបើតាមយោបល់ខ្ញុំបាទ អ្វីដែលត្រូវចាត់វិធានការក្តៅជាងនេះទៀតនោះ ប្រសិនជាស្ថានីយប្រេងណានៅតែបន្តលក់ប្រេងមិនគ្រប់ចំណុះ និងបន្លំគុណភាពនោះ ត្រូវចាត់វិធានការតាមច្បាប់ ។ មានន័យថា ត្រូវកសាងសំណុំរឿងបញ្ជូនទៅតុលាការជាចំាបាច់ ។ មិនតែប៉ុណ្ណោះ វិធានការនេះ ត្រូវធ្វើឲ្យបានជាប្រចាំ ពីព្រោះឈ្មួញអ្នករកស៊ីទុច្ចរឹត នៅតែចិញ្ចឹមចិត្តក្នុងការរកស៊ីបន្លំនោះជាដរាប គ្រាដែលសមត្ថកិច្ចភ្លេចខ្លួន ៕ ប្រជាពលរដ្ឋម្នាក់
