សារព័ត៌មាន នគរវត្ត តែងតែនាំមុខគេជានិច្ច
ក្នុងនាមប្រជាពលរដ្ឋម្នាក់ដែលមានចំណេះដឹងខ្សត់ខ្សោយ មិនយល់សោះចំពោះអ្វីដែលគេហៅថា ជោគជ័យ ក្នុងការបង្ក្រាបបានសំរាម៨៣កុងតឺន័រ ពោលគឺជាង១៦០០តោន ហើយត្រៀមបង្វិលឲ្យប្រទេសដើមវិញ ។ អានេះ វាជាសំរាម ចុះបើវាជាមាសសុទ្ធ មិនដឹងថា តើវាជាជោគជ័យក្នុងទំហំប៉ុនណានោះទេ? ចុះបើវាមិនមែនជាមាសសុទ្ធ ផ្ទុយទៅវិញ វាជាគ្រឿងញៀន? វាជាគ្រាប់រំសេវ?… ដែលត្រូវនាំចូលមកដល់ដល់កំពង់ផែក្រុងព្រះសីហនុ ហើយទើបដឹងជាក្រោយនោះ តើវានឹងជាជោគជ័យធំប៉ុណ្ណាទេ? យ៉ាងណាក៏ដោយ រឿងនេះហាក់ដូចជាលាក់បាំងចំពោះការទទួលខុសត្រូវក្នុងនាមស្ថាប័នជំនាញ ផ្ទុយទៅវិញ បែរជាបញ្ជាក់អំពីភាពជោគជ័យក្នុងការរកឃើញសំរាមទាំងនេះ និងកំពុងត្រៀមបញ្ជូនឲ្យប្រទេសដើមវិញ ។
មិនមែនតែខ្ញុំបាទម្នាក់នោះទេ ដែលមិនយល់អំពីជោគជ័យនេះ ប៉ុន្តែប្រជាពលរដ្ឋខ្មែរភាគច្រើន ក៏មិនយល់ដូចខ្ញុំបាទដែរ ហើយក៏ព្យាយាមមិនយល់តទៅទៀត គ្រាន់តែរង់ចាំមើលថា តើវេលាណាដែលអាជ្ញាធរមានសមត្ថកិច្ចនៃយើងបញ្ជូនសំរាមទាំងនោះឲ្យទៅប្រទេសដើមវិញ ហើយថា តើប្រទេសដើមនោះ គេព្រមទទួលដែរឬយ៉ាងណា? ទោះជាយ៉ាងណាក៏ដោយ ពលរដ្ឋខ្មែររំពឹងថា សំរាមទាំងជាង១៦០០តោននោះ នឹងត្រូវបញ្ជូនត្រឡប់ទៅប្រទេសកំណើតរបស់វាវិញ ។ អ្វីដែលរាស្ត្រខ្មែរមិនយល់ គឺចេះតែឆ្ងល់ថា ហេតុអ្វីសំរាមទាំងនោះ (៨៣កុងតឺន័រ) អាចធ្វើដំណើរមកដល់សមុទ្រព្រះរាជាណាចក្រកម្ពុជាបាន? វាគួរតែមានការត្រួតពិនិត្យពីដើមទី មិនមែនដោយសារការបន្លំឯកសារអ្វីឡើយ? បើសុទ្ធតែបន្លំឯកសារហើយត្រូវបាននាំមកដល់កម្ពុជានោះ គេអាចនឹងនាំអ្វីៗ ដែលបង្កហានិភ័យដល់ប្រទេសកម្ពុជាតាមរយៈការក្លែងបន្លំឯកសារ?
ពិតហើយ កម្ពុជាមិនមែនជាកន្លែងសម្រាប់ចាក់សំរាមចោលរបស់បណ្តាប្រទេសលោកខាងលិច ឬប្រទេសណាមួយនោះឡើយ ប៉ុន្តែការដែលយើងមិនអាចដឹងមុនថា គេនាំអ្វីមកឲ្យនោះ វាបង្កឲ្យមានហានិភ័យ និងគ្រោះថ្នាក់ខ្ពស់ ។ នេះចេះសមត្ថកិច្ចគយមានការសង្ស័យ ក៏នាំគ្នាគាស់ទូកុងតឺន័រមើល ចុះបើអត់សង្ស័យទេ វានឹងទៅជាយ៉ាងណា? សម្រាប់រាស្ត្រខ្មែរឆ្ងល់ថា គេអាចបន្លំឯកសារ ទាំងនោះហើយនាំសំរាមបានរាប់សិបពាន់តោនចូលមកដល់កម្ពុជា? នេះគឺជាបែបបទ និងនីតិវិធីរបស់គយ ដែលរាស្ត្រខ្មែរសាមញ្ញមិនអាចយល់បាន ប៉ុន្តែយ៉ាងណាក៏ដោយ វានៅតែជាជោគជ័យដ៏ធំធេង ដែលគយអាចចាត់វិធានការបានទាន់ពេល ប្រកបដោយភាពកក់ក្តៅសម្រាប់ប្រជាពលរដ្ឋក្នុងប្រទេស ។ ប៉ុន្តែបើនិយាយពីរឿងនេះ វាមិនមែនជាលើកទីមួយ ដែលថាកម្ពុជាគ្មានបទពិសោធន៍ក្នុងការទទួលកាកសំណល់ពីបរទេសនោះទេ ។ វាធ្លាប់បង្កឲ្យមានបញ្ហាជ្រួលច្របល់ម្តងរួចមកហើយនៅឯខេត្តព្រះសីហនុ ។
យ៉ាងណាក៏ដោយ យើងខ្ញុំជាប្រជាពលរដ្ឋ ក៏សម្តែងនូវករអបអរសាទរជាមួយសមត្ថកិច្ចជំនាញរបស់កម្ពុជា ដែលចាត់ការទាន់ពេលវេលា កុំអីស្បោងសំរាមកាកសំណល់ទាំងនោះ មុខជាហោះពេញផ្ទៃប្រទេសមិនខាន ។ មិនតិចទេ សំរាមជាង១៦០០តោន? ប្រសិនបើវាប៉ើងតាមខ្យល់មែននោះ វាមុខជាងងឹតមេឃរកធ្វើដំណើរមិនបាននោះទេ ។ ក្នុងនាមប្រជាពលរដ្ឋម្នាក់ សូមសម្តែងនូវការអបអរសាទរជាមួយអាជ្ញាធរ ដែលមានវិធានការទាន់ពេលវេលា ហើយរំពឹងថា សំណល់ប្ល៉ាស្ទិក ទាំង៨៣ទូកុងតឺន័រ ឬជាង១៦០០តោននោះ នឹងត្រូវបញ្ជូនទៅប្រទេសដើមវិញក្នុងពេលឆាប់ៗ ហើយប្រទេសដើមនោះ ក៏ព្រមទទួលយកដោយស្ម័គ្រចិត្ត ។ យើងមិនបាច់និយាយពីអ្នកទទួលខុសត្រូវអ្វីទេ ពីព្រោះថា វាកើតចេញពីការក្លែងបន្លំឯកសារ ។ ដូច្នេះកុំនិយាយពីរឿងអ្នកទទួលខុសត្រូវ គឺត្រូវ ខ័ណ្ឌចប់ ត្រឹមនេះ ៕ ប្រជាពលរដ្ឋម្នាក់
