សារព័ត៌មាន នគរវត្ត តែងតែនាំមុខគេជានិច្ច
ក្នុងនាមប្រជាពលរដ្ឋមួយរូបរស់នៅខេត្តបាត់ដំបងចាប់អារម្មណ៍ចំពោះព័ត៌មានដែលថ្នាក់ដឹកនាំនៃស្នងការនគរបាលខេត្តនេះ បានពង្រឹង នោះគឺការដែលមិនឲ្យមានបុគ្គលជាមន្ត្រីនគរបាលទម្លាយព័ត៌មានផ្ទៃក្នុងចេញទៅខាងក្រៅដោយគ្មានការអនុញ្ញាត ដែលវិធានការនេះស្របតាមច្បាប់ទម្លាប់របស់នគរបាលជាតិ ។ ប៉ុន្តែអ្វីដែលប្រជាពលរដ្ឋចង់បាន គឺមិនមែនការលាក់បាំងព័ត៌មាន ឬទម្លាយព័ត៌មានផ្ទៃក្នុង… អ្វីនោះទេ ផ្ទុយទៅវិញ គឺចង់ឃើញអំពីការធានាបានសុខសន្តិភាពជូនប្រជាពលរដ្ឋ ប្រកបដោយភាពកក់ក្តៅ ស្របតាមគោលនយោបាយភូមិ ឃុំ មានសុវត្ថិភាព ។
បច្ចុប្បន្ននេះ តាមការកត់សម្គាល់របស់ខ្ញុំបាទ ពាក់ព័ន្ធនឹងបញ្ហាសន្តិសុខនៅខេត្តបាត់ដំបង គឺប្រជាពលរដ្ឋមានសេចក្តីព្រួយបារម្ភជាខ្លាំងពីព្រោះ សូម្បីតែករណីចោរគាស់ផ្ទះ ដែលកើតឡើងស្ទើររាល់ថ្ងៃ ទាំងនៅក្រុងបាត់ដំបង ក៏ដូចជានៅតាមទីជនបទដាច់ស្រយាល យូរៗម្តង នគរបាលបានបំបែកសំណុំរឿង ។ ករណីនេះ គឺដោយសារតែបញ្ហាល្បែងស៊ីសងបានកើតឡើងស្ទើរគ្រប់ច្រកល្ហក មិនថានៅកណ្តាលក្រុងបាត់ដំបង ឬនៅតាមទីជនបទនោះទេ ។ ក្រៅពីល្បែងស៊ីសង ដែលកំពុងវក់វីអង្រួនខេត្តបាត់ដំបងនោះ ក៏នៅមានបញ្ហាគ្រឿងញៀន ដែលបាននិងកំពុងកើតឡើងគ្រប់ច្រកល្ហកផងដែរ ។ ល្បែងស៊ីសង, គ្រឿងញៀន គឺជាប្រភពដែលនាំឲ្យមានបញ្ហាចោរកម្ម លួច ឆក់ ប្លន់ ជាពិសេសករណីគាស់ផ្ទះទាំងថ្ងៃនេះឯង ។
ករណីគាស់ផ្ទះដែលគួរឲ្យកត់សម្គាល់បានកើតឡើងនៅកណ្តាលថ្ងៃទី២ ខែសីហា ឆ្នាំ២០១៩ ដែលផ្ទះពីរជាប់គ្នានៅម្តុំវត្តរំដួល ក្នុងសង្កាត់ចំការសំរោង ក្រុងបាត់ដំបង ត្រូវចោរគាស់ប្រមូលយកទ្រព្យសម្បត្តិអស់មួយចំនួនធំ ។ ស្របពេលដែលមានករណីចោរគាស់ផ្ទះ កើតឡើង យ៉ាងគគ្រឹកគគ្រេងបែបនេះ ស្នងការនគរបាលខេត្តបាត់ដំបងប្រកាសណែនាំមន្ត្រីនគរបាលទាំងអស់ មិនត្រូវផ្តល់ព័ត៌មានផ្ទៃក្នុងអង្គភាពទៅឲ្យតតិយជនដោយគ្មានការអនុញ្ញាត មិនតែប៉ុណ្ណោះ នឹងត្រូវទទួលទណ្ឌកម្មតាមវិន័យលេខ០០៦របស់កងកម្លាំងនគរបាលជាតិទៅវិញ ។ នៅក្នុងកិច្ចប្រជុំកាលពីថ្ងៃទី១ ខែសីហា លោកស្នងការនគរបាលខេត្តបាត់ដំបងព្រមានថា ចាប់ពីថ្ងៃនេះទៅ មន្ត្រីនគរបាលរូបណា ដែលផ្តល់ព័ត៌មានផ្ទៃក្នុងអង្គភាពទៅឲ្យបុគ្គលណាមួយ ដោយគ្មានការអនុញ្ញាតពីថ្នាក់ដឹកនាំ មន្ត្រីនគរបាលនោះនឹងត្រូវទទួលទណ្ឌកម្មស្របតាមវិន័យលេខ០០៦ របស់កងកម្លាំងនគរបាលជាតិ ។
អ្វីដែលបានឃើញនៅពេលនេះ គឺជារឿងពីរដែលខុសគ្នាស្រឡះ ។ ក្នុងនាមប្រជាពលរដ្ឋ ដែលមិនសូវយល់ច្បាប់សមត្ថកិច្ច មិនដឹងថា តើស្នងការនគរបាលខេត្តបាត់ដំបងខ្លាចចំណុចខ្សោយរបស់ខ្លួនត្រូវបានមន្ត្រីក្រោមឱវាទបកអាក្រាត ឬក៏សមត្ថភាពរបស់ខ្លួនខ្សោយក្នុងការចាប់ចោរគាស់ផ្ទះ ទើបបានជាចេញវិធានការបែបនេះ ។ ការដែលអាជ្ញាធរមានសមត្ថកិច្ចជាពិសេសនគរបាលខេត្តបាត់ដំបង មិនអាចបង្ក្រាបបានករណីចោរគាស់ផ្ទះ ឬយូរៗបង្ក្រាបបានម្តង គឺមានន័យថា នគរបាលដែលមានកាំភ្លើងនៅដៃ ខ្សោយជាងចោរគាស់ផ្ទះកំប៉ិកកំប៉ុកទាំងនោះ ។ យូរៗម្តង គេឃើញ នគរបាលក្រុងបាត់ដំបង ឬខេត្តបាត់ដំបងបំបែកសំណុំរឿងករណី ចោរគាស់ផ្ទះនេះ ។ ករណីចោរគាស់ផ្ទះ ទំនងជាត្រូវបានហាមប្រាមមិនឲ្យនគរបាលទម្លាយប្រាប់អ្នកកាសែត ប៉ុន្តែបើចាប់បានចោរគាស់ផ្ទះ ត្រូវធ្វើសន្និសីទកាសែត ។
បាត់ដំបងខ្ញុំអើយ! យាយៗអង្គុយលេងបៀតាមផ្ទះ ត្រូវបានគេចាប់ថតផ្សាយប្រៀបដូចអ្នកទោសព្រហ្មទណ្ឌ ។ ប៉ូន្តែវង់ល្បែងធំៗ ជាច្រើនកន្លែង ដែលឈ្មួញបង្កើតឡើង បង្កឲ្យមានបញ្ហាអសន្តិសុខក្នុងសង្គម ចោរលួច ចោរឆក់ ចោរប្លន់ ចោរគាស់ផ្ទះ មិនត្រូវបាននគរបាលបង្ក្រាបនោះទេ ។ ក្រៅពីនោះ គ្រឿងញៀនក៏កំពុងញាំញីខេត្តបាត់ដំបងខ្លាំងណាស់ដែរ ។ អាជ្ញាធរមានសមត្ថកិច្ចបានត្រឹមប្រកាសចាត់វិធានការម្តងហើយម្តងទៀត… ប៉ុន្តែបញ្ហានៅតែដដែល មិនអាចកាត់បន្ថយសេចក្តីព្រួយបារម្ភ ផ្តល់ភាពកក់ក្តៅជូនប្រជាពលរដ្ឋបាននោះឡើយ ។ ក្នុងនាមជាប្រជាពលរដ្ឋម្នាក់ ខ្ញុំបាទយល់ថា គឺដោយសារសមត្ថកិច្ចខ្សោយ ទើបបានជាក្រុមចោរខ្លាំង ។ ដូច្នេះ ថ្នាក់ដឹកនាំក្រសួងមហាផ្ទៃ ក៏ដូចអគ្គស្នងការនគរបាលជាតិ គួររកអ្នកដឹកនាំខ្លាំង យកមកដាក់នៅខេត្តបាត់ដំបងនេះ ដើម្បីផ្តល់ភាពកក់ក្តៅជូនប្រជាពលរដ្ឋ ៕ ប្រជាពលរដ្ឋម្នាក់
