សារព័ត៌មាន នគរវត្ត តែងតែនាំមុខគេជានិច្ច
អាជ្ញាធរខេត្តកំពង់ធំក្រោមអំណាចបញ្ជាដឹកនាំរបស់លោកសុខ លូ ជាអភិបាលខេត្តមើលមិនឃើញទាល់តែសោះចំពោះបញ្ហាបទល្មើសនេសាទ ។ នៅតំបន់ផាត់សណ្តាយ បន្ទាប់ពីបញ្ចប់បទល្មើសដាក់បរ និងបទល្មើសផ្សេងៗទៀតនោះ ពេលនេះ ដល់បទល្មើសអួន ហ៊ុម និងដាក់សម្រាស់ ។ អួន ហ៊ុមដែលប្រើទូកកាណូតធំៗ កំពុងធ្វើសកម្មភាពរាល់ថ្ងៃ រីឯការដាក់សម្រាស់ ក៏កំពុងដំណើរការនេសាទប្រមូលផលត្រីជារៀងរាល់ថ្ងៃដែរ ។ ពួកអ្នកនេសាទល្មើសច្បាប់មុនធ្វើសកម្មភាពអូសអួនហ៊ុម ឬកៀរត្រីតាមសម្រាស់ គ្រាន់តែជូនដំណឹងលោកយ៉ាន់ វិសាក់ ហៅសែ នាយផ្នែករដ្ឋបាលជលផលផាត់សណ្តាយជាមុនគឺជាការស្រេច ។
បើតាមសេចក្តីរាយការណ៍បានឲ្យដឹងថា គ្មានទេការបង្ក្រាបបទល្មើសដោយពួកមន្ត្រីជលផលនៅខេត្តកំពង់ធំរាយការណ៍ថ្នាក់ដឹកនាំខេត្តថា ឆ្នាំនេះគ្មានត្រីនោះទេ ដូច្នេះក៏គ្មានការនេសាទល្មើសច្បាប់អ្វីដែរ ។ សំអាងទៅលើហេតុផលនៃការគ្មានត្រី ទើបអាជ្ញាធរខេត្តកំពង់ធំក្រោមការដឹកនាំរបស់លោកសុខ លូ ក៏បន្តធ្វើមិនដឹងមិនឮ គឺបណ្តោយឲ្យមានបទល្មើសនេសាទយ៉ាងគគ្រឹកគគ្រេងនៅតំបន់បឹងទន្លេសាប ។ ក្រោមលេសថាគ្មានត្រីពួកអ្នកនេសាទល្មើសច្បាប់អាចធ្វើសកម្មភាពនេសាទបានដោយសេរី ដោយគ្រាន់តែទាក់ទងជាមួយសមត្ថកិច្ចជំនាញ ពោលគឺរដ្ឋបាលជលផល ។ ពួកមន្ត្រីរដ្ឋបាលជលផលត្រូវគេពិពណ៌នាប្រដូចទៅនឹងសត្វមាន់ ដែលពងនៅលើជង្រុកស្រូវ ។ សម្រាប់ថ្នាក់ដឹកនាំខេត្តកំពង់ធំ បន្តបិទភ្នែកកុហក់ថ្នាក់លើបន្ថែមទៀត ក្រោមលេសតែមួយគឺឆ្នាំនេះមិនមានត្រីដែលបង្កឲ្យឈ្មួញអាចនេសាទល្មើសច្បាប់នោះទេ ។ ប៉ុន្តែតាមពិតគឺពួកឈ្មួញនេសាទល្មើសសច្បាប់ជាចំហរដោយសេរីរាល់ថ្ងៃ ។
បញ្ហាបទល្មើសនេសាទក្លាយទៅជាប្រព័ន្ធដ៏ធំមួយនៅខេត្តកំពង់ធំសព្វថ្ងៃនេះ ។ ប្រធានមន្ទីរកសិកម្មខេត្ត ក៏ដូចជានាយខណ្ឌរដ្ឋបាលជលផលមិនដែលបញ្ចេញប្រតិកម្មទាល់តែសោះ ក្នុងការចុះទៅបង្ក្រាប ឬបើកភ្នែកមើលបទល្មើសនេសាទ ។ ពួកគេរួមគ្នាតាំងពីថ្នាក់នាយផ្នែករដ្ឋបាលជលផលរហូតដល់នាយខណ្ឌ និងប្រធានមន្ទីរកសិកម្មខេត្តផង ក្នុងការកសាងបទល្មើសនេសាទនេះ ។ ពួកគេពេលខ្លះទទួលស្គាល់ថាមានបទល្មើស ប៉ុន្តែបទល្មើសទាំងនោះមិនមានផលនេសាទច្រើនដែលត្រូវចុះបង្ក្រាបនោះឡើយ ។ ប្រជាពលរដ្ឋនៅតំបន់ផាត់សណ្តាយ ក្នុងស្រុកកំពង់ស្វាយ ខេត្តកំពង់ធំនិយាយថា រាស្ត្រក្រីក្រនេសាទដើម្បីចិញ្ចឹមឆ្នាំង នឹងត្រូវចាប់ដោយពួកមន្ត្រីជលផលជាមិនខាន ។ ប៉ុន្តែពួកឈ្មួញធំៗ នេសាទប្រើឧបករណ៍ល្មើសច្បាប់ មិនមានពួកមន្ត្រីជលផលទៅបង្ក្រាបនោះទេ ៕
