សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ លោក Tengku Zafrul Abdul Aziz រដ្ឋមន្រ្តីក្រសួងហិរញ្ញវត្ថុម៉ាឡេស៊ី កាលពីថ្ងៃទី២០ ខែមីនា ឆ្នាំ២០២១ បានអះអាងថា៖ ការផ្តាច់ចំណងការទូតជាមួយកូរ៉េខាងជើង គឺមិនធ្វើឲ្យប៉ះពាល់ដល់សេដ្ឋកិច្ចរបស់ប្រទេសខ្លួននោះឡើយ ដ្បិតចំណងសេដ្ឋកិច្ចជាមួយកូរ៉េខាងជើងមានតិចតួចប៉ុណ្ណោះ។ ជាក់ស្ដែងការផ្តាច់ទំនាក់ទំនងការទូតរវាងម៉ាឡេស៊ី និងកូរ៉េខាងជើងក្លាយជាប្រធានបទក្តៅថ្មីមួយសម្រាប់តំបន់។ ខណៈការប្រែប្រួលនេះ បានធ្វើឲ្យមានការចោទជាសំណួរចំពោះម៉ាឡេស៊ីថា ការលែងរាប់អានកូរ៉េខាងជើងបង្កផលប៉ះពាល់ដល់សេដ្ឋកិច្ចរបស់ម៉ាឡេស៊ីឬយ៉ាងណា។
បើតាមរដ្ឋមន្ត្រីក្រសួងហិរញ្ញវត្ថុម៉ាឡេស៊ី បានអះអាងប្រាប់ទូរទស្សន៍សិង្ហបុរី CNA ដោយឆ្លើយតបនឹងចំពោះសំណួរថា តេីវានឹងមិនបង្កឲ្យមានផលប៉ះពាល់ខ្លាំងដល់ផ្នែកសេដ្ឋកិច្ចម៉ាឡេស៊ីនោះទេ។ រដ្ឋមន្ត្រីក្រសួងហិរញ្ញវត្ថុរូបនេះ បញ្ជាក់នៅចំពោះមុខអ្នកកាសែត ក្រោយចូលរួមក្នុងកិច្ចប្រជុំ ជាមួយសហគ្រិនក្នុងស្រុកយ៉ាងដូច្នេះថា៖«ខ្ញុំមិនគិតថាវាមានផលប៉ះពាល់អ្វីនោះទេ ព្រោះវាជាការចូលរួមចំណែកតូចតាចមួយប៉ុណ្ណោះ»។
យ៉ាងណាមិញ ភ្លាមៗក្រោយកូរ៉េខាងជើងប្រកាសផ្តាច់ចំណងការទូតក្រសួងការបរទេស ម៉ាឡេស៊ីក៏បានបិទស្ថានទូតរបស់ខ្លួន នៅទីក្រុងព្យុងយ៉ាង ជាការឆ្លើយតបវិញ និងរិះគន់ចំពោះការសម្រេចចិត្តរបស់ក្រុងព្យុងយ៉ាងដែរ។ បុគ្គលិកការទូតនិងអ្នកនៅក្នុងបន្ទុករបស់ពួកគេទាំងអស់នៅស្ថានទូតកូរ៉េខាងជើងប្រចាំនៅក្រុងកូឡាឡាំពួ ក៏តម្រូវឲ្យចាកចេញក្នុងរយៈពេល ៤៨ ម៉ោងដែរ។
បេីមែនទែនទៅ កាលពីថ្ងៃទី១៩ ខែមីនាកន្លងទៅនេះកូរ៉េខាងជើង បានប្រកាសផ្តាច់ទំនាក់ទំនងទ្វេភាគី ជាមួយម៉ាឡេស៊ីជា ដាច់ខាត ដោយផ្ដល់ហេតុផលថា ម៉ាឡេស៊ី បានប្រព្រឹត្តទង្វើជាសត្រូវប្រឆាំងនឹង កូរ៉េខាងជើង ក្រោយតុលាការ ប្រទេសនេះកាត់សេចក្តីដោយអនុញ្ញាតដល់ការបញ្ជូនប្រជាជនកូរ៉េខាងជើងម្នាក់ ទៅសហរដ្ឋអាមេរិក ដោយប្រឈម នឹងបទចោទ លាងលុយកខ្វក់។ កូរ៉េខាងជើងអះអាងថាពលរដ្ឋខ្លួនស្អាតស្អំនិងបានរកស៊ីស្របច្បាប់ ជាច្រើនឆ្នាំ មកហើយ។
គួរបញ្ជាក់ដែរថា ម៉ាឡេស៊ី និងកូរ៉េខាងជើង បានភ្ជាប់ទំនាក់ទំនងការទូតតាំងពីឆ្នាំ១៩៧៣មក។ ដោយឡែក ទំនាក់ទំនងសេដ្ឋកិច្ចរវាងប្រទេសទាំងពីរនៅមានទំហំតូចនៅឡើយ ខណៈកូរ៉េខាងជើងនាំចូលប្រេងចម្រាញ់រួច និងជ័រធម្មជាតិពីម៉ាឡេស៊ី។ ចំណែកឯម៉ាឡេស៊ី នាំចូលដែកថែប និងផលិតផលធ្វើពីដែកពីកូរ៉េខាងជើងត្រឡប់ទៅវិញ៕ដោយ៖ស តារា
លោក Tengku Zafrul Abdul Aziz រដ្ឋមន្រ្តីក្រសួងហិរញ្ញវត្ថុម៉ាឡេស៊ី
រូបថត៖ MCI Eng
