សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មួយខែទៀតការជជែកអំពីប្រាក់ឈ្នួលកាត់ដេរនិងចាប់ផ្ដើមហើយ ។ យ៉ាងណាក៏ដោយក្រុមសហជីពនិងកម្មកររំពឹងថាពួកគេអាចនឹងទទួលបានប្រាក់ឈ្នួលអប្បបរមាយ៉ាងហោចណាស់២០០ដុល្លារក្នុងមួយខែទើបអាចសមាមាត្រទៅនឹងការចំណាយប្រចាំថ្ងៃ។ រីឯខាងសមាគមរោងចក្រកាត់ដេតវិញមើល ឃើញថាការខិតខំប្រឹងប្រែងរបស់ក្រុមកម្មករម្នាក់ៗក៏ជាកត្តាសំខាន់ផងដែរ។
កម្មករក៏ដូចជានិយោជិតក្នុងវិស័យកាត់ដេរនៅកម្ពុជា ចង់ឃើញការតម្លើងប្រាក់ឈ្នួលកើនឡើងបន្ថែមទៀត ប្រមាណជាង ២០០ដុល្លារ ក្នុង១ខែដើម្បីឲ្យសមាមាត្រទៅនឹងការចំណាយប្រចាំថ្ងៃក្នុងការរស់នៅ និងសេដ្ឋកិច្ចបច្ចុប្បន្ន ខណៈការចចារប្រាក់ឈ្នួលអប្បបរមាសម្រាប់ឆ្នាំ២០២៣ បានឈានមកដល់ចាប់ពីខែកក្កដានេះតទៅ។ វិបត្តិសេដ្ឋកិច្ចសកលកំពុងជះឥទ្ធិពលដល់ការរស់នៅនិងជីវភាពប្រចាំថ្ងៃរបស់កម្មករ-កម្មការិនីផងផងដែរ។
កម្មករកម្មការិនីជាច្រើនប្រាថ្នាចង់ឃើញមានការដំឡើងប្រាក់បៀវត្សឲ្យសមស្របទៅនឹងតម្លៃទំនិញនាពេលសព្វថ្ងៃនេះ។ កម្មការិនី ឆ ហុងមួយ និងកម្មករ សាំង សុធា បច្ចុប្បន្នបម្រើការងារក្នុងរោងចក្រកាត់ដេរមួយកន្លែង ស្ថិតនៅតំបន់វេងស្រេង ខណ្ឌពោធិ៍សែនជ័យ រាជធានីភ្នំពេញ បាននិយាយថា ប្រាក់ឈ្នួលត្រូវបានដំឡើងជាបន្ត បន្ទាប់រហូត ១៩៤ដុល្លារ ក្នុង១ខែៗ ប៉ុន្តែការចំណាយក៏កើនដូចគ្នា ដូចជាថ្លៃបន្ទប់ជួល និងថ្លៃអាហារហូបចុកជាដើម។
លោក កាំង ម៉ូនីកា អគ្គលេខាធិការរង នៃសមាគមរោងចក្រកាត់ដេរកម្ពុជា (GMAC) បានលើកឡើងថា ការចចារប្រាក់ឈ្នួលអប្បបរមា ត្រូវផ្អែកលើលក្ខណៈវិនិច្ឆ័យទាំង៧ ដែលមានលក្ខណៈវិទ្យាសាស្រ្តជាក់ស្តែង និងត្រូវពឹងផ្អែកលើតួលេខផ្លូវការរបស់រាជរដ្ឋាភិបាល ដើម្បីយកមកធ្វើជាមូលដ្ឋាន។
លោកបន្ថែមថា ចំពោះមុខ សូមឲ្យកម្មករនិយោជិតទាំងអស់ ព្យាយាមសហការជាមួយភាគីនិយោជក ធ្វើយ៉ាងណាលើកកម្ពស់ផលិតភាពការងារ ព្រោះ មានតែផលិតភាពការងារទេ ដែលជួយធ្វើឲ្យកម្រិតប្រាក់ ចំណូលរបស់សហគ្រាស រោងចក្រកើនឡើង។ ប្រសិនបើការងារមិនល្អហើយព្យាយាមទាមទារប្រាក់ខែឡើងច្រើននោះក៏មិនសមរម្យដែរ។
លោក ងុយ រិទ្ធ អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ការពិភាក្សាប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបសម្រាប់ឆ្នាំ២០២៣ នៅខែកក្កដានេះ ជាការចាប់ផ្តើមពិភាក្សា ជាលក្ខណៈផ្ទៃក្នុងរបស់ភាគីនីមួយៗ ហើយនៅខែសីហា ជាការចាប់ផ្តើមពិភាក្សា ជាលក្ខណៈទ្វេភាគី និងត្រីភាគី។ នៅខែកញ្ញា ក្រសួងនឹងបើកកិច្ចប្រជុំរួម ដើម្បីសម្រេច និងបញ្ចប់ផ្លូវការ៕
ដោយ៖ សូរិយា
