សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ ជនសង្ស័យ២នាក់ជិះម៉ូតូមួយគ្រឿងឌុបគ្នាក្នុងគោលបំណងទៅធ្វើសកម្មភាពលួចម៉ូតូនៅក្នុងបរិវេណវត្តឥន្ទលីបូរ តែមិនបានសម្រេចត្រូវប្រជាពលរដ្ឋនិងព្រះសង្ឃឡោមព័ទ្ធក្របួចចាប់ខ្លួនបាន កាលពីវេលាម៉ោង៥ និង៤០នាទី ថ្ងៃទី២៣ ខែមិថុនា ឆ្នាំ២០១៧ ស្ថិតក្នុងភូមិពុកឬស្សី ឃុំពុកឬស្សី ស្រុកខ្សាច់កណ្តាល ខេត្តកណ្តាល ។
មន្ត្រីនគរបាលស្រុកខ្សាច់កណ្តាលបានឲ្យដឹងថា ជនសង្ស័យដែលត្រូវបានចាប់ខ្លួននោះឈ្មោះ ហ៊ុន មករា ហៅរ៉ា ភេទប្រុស អាយុ៤០ឆ្នាំ ជនជាតិខ្មែរ មុខរបរ រត់ម៉ូតូឌុប មានទីលំនៅឃុំរកាខ្ពស់ ស្រុកស្អាង ខេត្តកណ្តាល បច្ចប្បន្នស្នាក់នៅផ្ទះជួលភូមិព្រែកតាគង់ សង្កាត់ចាក់អង្រែ ខណ្ឌចំការមន រាជធានីភ្នំពេញ ។ រីឯបក្ខពួកម្នាក់ទៀតដែលរត់គេចខ្លួននោះឈ្មោះ ធី ហៅ ម៉ៅ ភេទប្រុស អាយុ៣៨ឆ្នាំ ជនជាតិខ្មែរ មុខរបរ មិនពិតប្រាកដ បច្ចុប្បន្នស្នាក់នៅក្នុង រាជធានីភ្នំពេញ ។
ប្រភពដដែលបានបន្តថា ក្នុងប្រតិបត្តកាលបង្រ្កាបចាប់ខ្លួនជនសង្ស័យ សមត្ថកិច្ចបានធ្វើការដកហូតវត្ថុតាងនៅជាប់ខ្លួនជនសង្ស័យរួមមាន៖ ម៉ូតូមួយគ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៣ ពាក់ស្លាកលេខភ្នំពេញ1BW-8948 ,ស្លាកលេខចំនួន០១សន្លឹក(ភ្នំពេញ1DE-9126) ,ដង្កាប់ចំនួន០១ ,កូនសោរចំនួន០២ដើម ,ទួលណឺវីសចំនួន០១ ,ខ្ចៅសម្រាប់ចាប់ស្លាកលេខចំនួន០៦គ្រាប់ និងទូរស័ព្ទដៃ០១គ្រឿងផងដែរ ។
ប្រភពដដែលបានបន្តថា រយៈពេលកន្លងមកនៅក្នុងបរិវេណវត្តឥន្ទលីបូរតែងតែបាត់ម៉ូតូជាញ៉ឹកញាប់ ។ លុះមកដល់ព្រឹកថ្ងៃទី២៣ ខែមិថុនា ឆ្នាំ២០១៧ ព្រះសង្ឃគង់នៅក្នុងវត្តព្រមប្រជាពលរដ្ឋបានប្រទះឃើញជនសង្ស័យជិះម៉ូតូឌុបគ្នាចូលទៅក្នុងវត្តដើរចុះឡើង ដោយមានការសង្ស័យបងប្អូនប្រជាពលរដ្ឋ និងព្រះសង្ឃបាននាំគ្នាចាំឃ្លាំមើល ខណៈនោះជនសង្ស័យម្នាក់ដែលកំពុងដើរចុះឡើងនោះបានដើរគេចចេញទៅក្រៅរបងវត្ត ។ ឃើញដូច្នេះប្រជាពលរដ្ឋ និងព្រះសង្ឃក៏សម្រេចឡោមព័ទ្ធចាប់ខ្លួនដែលកំពុងជិះម៉ូតូចម្រុងនឹងចេញក្រៅរបងវត្ត ឆែកឆេររកឃើញមានវត្ថុតាងពាក់ព័ន្ធក៏ចាប់ខ្លួនជនសង្ស័យប្រគល់ឲ្យសមត្ថកិច្ចនគរបាល ដើម្បីធ្វើការសាកសួរនិងកសាងសំណុំរឿងចាត់ការតាមច្បាប់ ។
នៅចំពោះមុខសមត្ថកិច្ចនគរបាលជនសង្ស័យឈ្មោះ ហ៊ុន មករា ហៅរ៉ា បានសារភាពថា នៅមុនពេលកើតហេតុរូបគេបានជិះម៉ូតូឌុបបក្ខពួកម្នាក់មកពីរាជធានីភ្នំពេញ ដើម្បីធ្វើសកម្មភាពលួចម៉ូតូរបស់ប្រជាពលរដ្ឋក្នុងស្រុកខ្សាច់កណ្តាល ។ ពេលមកដល់ក៏ជិះម៉ូតូចូលទៅក្នុងវត្តឥន្ទលីបូរ ក្នុងគោលបំណងលួចម៉ូតូនៅទីនោះ ខណៈកំពុងដើរមើល ក៏ត្រូវបានប្រជាពលរដ្ឋ និងព្រះសង្ឃចាប់ខ្លួនរូបគេតែម្តង គ្រាដែលបក្ខពួកម្នាក់ទៀតដឹងខ្លួនមុនរត់គេចខ្លួនបាត់ ៕ ស្អាងជ័យ
