សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ ជនសង្ស័យម្នាក់ ត្រូវបានកម្លាំងសមត្ថកិច្ចប៉ុស្តិ៍នគរបាលរដ្ឋបាលទួលស្វាយព្រៃ១២ ធ្វើការឃាត់ខ្លួន ក្រោយ ពីធ្វើសកម្មភាពលួច ទូរស័ព្ទ I Phone 7 plus បានសម្រេចតែរត់មិនរួច។
ហេតុការណ៍នេះកើតឡើងកាលពីវេលាម៉ោង ០៣និង០៥នាទីរសៀល ថ្ងៃពុធ ១កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី ១៧ ខែ មករា ឆ្នាំ ២០១៨ ចំណុចខាងមុខ ផ្ទះលេខ២០៥ តាមបណ្ដោយផ្លូវលេខ៣៨៨ សង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ។
ជនសង្ស័យ ឈ្មោះ គង វណ្ណៈ ភេទប្រុស អាយុ ៣១ឆ្នាំ មុខរបរ បុគ្គលិក ធានាគា ស្នាក់នៅភូមិ ៥៥ ឃ៉ំក្រែក ស្រុកពញាក្រែក ខេត្តត្បូងឃ្ម៉ំ។
ចំណែកជនរងគ្រោះឈ្មោះ សុខ លាភ ភេទប្រុស អាយុ៣១ មុខរបរលក់ទូរស័ព្ទ ស្នាក់នៅផ្ទះលេខ ៧៥ ផ្លូវលេខ ២០៥កែងផ្លូវលេខ៣៨៨ ក្នុង សង្កាត់ទួលស្វាយព្រៃ២ ខណ្ឌចំការមន។
ប្រភពព័ត៌មានពីជនរងគ្រោះបានប្រាប់អោយដឹងថា មុនកើតហេតុជនសង្ស័យម្នាក់ ជិះម៉ូតូ មួយគ្រឿង ម៉ាក ហុងដា សេ១២៥ ពណ៌ខ្មៅ សេរី២០១៣ ពាក់ស្លាកលេខ ភ្នំពេញ ១BS-៦៨៤៤ បានជិះម៉ូតូចូលមកកន្លែងជនរងគ្រោះលក់ទូរស័ព្ទ តាមបណ្តោយផ្លូវលេខ២០៥ កែងផ្លូវលេខ៣៨៨ ដោយមិនឃើញម្ចាស់នៅយាមកន្លែង ជនសង្ស័យបានធ្វើសកម្មភាពលួចទូរស័ព្ទដៃមួយគ្រឿងម៉ាក I Phone 7 plus ពណ៌ក្រហម បានសម្រេច ហើយភ្លាមនោះជនរងគ្រោះក៏ឃើញទាន់បានដេញចាប់រហូតមកដល់ខាងមុខមន្ទីពេទ្យរុស្សី ក៏ប្រទះសមត្ថកិច្ចប៉ុស្តិ៍នគរបាលរដ្ឋបាលទំនប់ទឹក កំពុងល្បាត់ក៏ ដេញតាមឃាត់ខ្លួនជនសង្ស័យបានភ្លាមៗតែម្តង។
បញ្ជាក់ទូរស័ព្ទរបស់ជនរងគ្រោះត្រូវបានសមត្ថកិច្ចប៉ុស្តិ៍នគរបាលរដ្ឋបាលទួលស្វាយព្រៃ២ ប្រគល់អោយជនរងគ្រោះវិញ។
បច្ចុប្បន្នជនសង្ស័យខាងលើ ត្រូវបានសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌចំការមន ដើម្បីកសាងសំណុំរឿងបញ្ជូនទៅកាន់តុលាការ ចាត់ការបន្តតាមនីតិវិធី៕ ស រស្មី
