សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោកឧកញ៉ា គឹម សាវុធ ប្រធានក្រុមហ៊ុននាំចេញអង្ករទៅកាន់ប្រទេសហ្វីលីពីន បានមានប្រសាសន៍នៅថ្ងៃទី៤ ខែកញ្ញា ឆ្នាំ២០២៣នេះថា៖” នេះជាលើកទី២ហើយ ដែលកម្ពុជា បានបន្តនាំចេញអង្ករទៅប្រទេសហ្វីលីពីន ក្នុងបរិមាណជាង១ពាន់តោន” ខណៈអ្នកនាំចេញលើកឡើងពីបញ្ហាប្រឈម ដោយសារតែតម្លៃស្រូវឡើងថ្លៃ ដែលអាចនឹងប៉ះពាល់ដល់ការនាំចេញអង្ករលើកក្រោយ។
លោកប្រធានក្រុមហ៊ុនរូបនេះ បានគូសបញ្ជាក់ថា ការនាំចេញអង្ករក្នុងបរិមាណ ១០៤០តោន ទៅកាន់ប្រទេសហ្វីលីពិន លើកទី២នេះ បានធ្វើឡើងកាលពីខែសីហា ឆ្នាំ២០២៣។ អង្ករដែលបាននាំចេញ គឺជាប្រភេទអង្ករធម្មតា។ ប៉ុន្តែ លោកមិនទាន់មានគម្រោងនាំចេញបន្ថែមទៀតនោះទេ ដោយសារបច្ចុប្បន្ននេះតម្លៃស្រូវនៅកម្ពុជា ជាពិសេសប្រភេទស្រូវធម្មតា បានឡើងថ្លៃខ្ពស់ពេក ខណៈអ្នកទទួលទិញនៅហ្វីលីពីន មិនព្រមតំឡើងថ្លៃអង្ករ ហេតុនេះហើយទើបលោកមិនអាចនាំចេញទៀតបាន ព្រោះមិនទទួលបានផលចំណេញ។
ជាមួយគ្នានេះ អគ្គលេខាធិការសហព័ន្ធស្រូវអង្ករកម្ពុជា លោក លន់ យ៉េង បានសាទរ ចំពោះនាំចេញអង្ករជើងទី២ ទៅកាន់ប្រទេសហ្វីលីពិន ក្នុងបរិមាណជាង១ពាន់តោននេះ ក្រោយពីកម្ពុជាព្យាយាមចាប់យកទីផ្សារនេះជាច្រើនឆ្នាំ។ តែយ៉ាងនេះក្តីលោកបារម្ភថា ការឡើងថ្លៃស្រូវជាពិសេសប្រភេទស្រូវធម្មតា ដែលជាប្រភេទអង្ករហ្វីលីពិនត្រូវការ បានឡើងថ្លៃគួរឱ្យកត់សម្គាល់ ដែលអាចនឹងប៉ះពាល់ដល់ការនាំចេញ។
យោងតាមតម្លៃស្រូវដែលកត់ត្រា ដោយសហព័ន្ធស្រូវអង្ករកម្ពុជា តម្លៃស្រូវនៅដើមខែកញ្ញានេះ មានតម្លៃជាមធ្យមប្រមាណ ១៣០០រៀលក្នុងមួយគីឡូក្រាម។ ចំណែកតម្លៃអង្ករប្រភេទធម្មតានៅលើទីផ្សារអន្តរជាតិ មានតម្លៃប្រមាណ ៦៥០ដុល្លារក្នុងមួយតោន។
យោងតាមរបាយការណ៍សហព័ន្ធស្រូវអង្ករកម្ពុជា ក្នុងរយៈពេល ៧ខែ ឆ្នាំ២០៣នេះ កម្ពុជាបាននាំចេញអង្ករបានចំនួន ៣៦២ ៧០៨តោន បានចំណូលជាង២៥៣លានដុល្លារ ខណៈការនាំចេញស្រូវបានចំនួន ២.៤លានតោន ទទួលបានចំណូលជាង ៦៦៣លានដុល្លារ។
គួរជម្រាបថា កម្ពុជាបានចាប់ផ្តើមនាំចេញអង្ករក្នុងបរិមាណច្រើនជាលើកដំបូង ទៅប្រទេសហ្វីលីពីន ក្នុងបរិមាណ២ ៥៧៥តោន ក្នុងនោះប្រភេទអង្ករផ្កាម្លិះក្រហមចំនួន ៧៥តោន និងប្រភេទអង្ករបាយទន់ចំនួន ២៥០០តោន កាលពីដើមឆ្នាំ២០២៣នេះ បន្ទាប់ពីហ្វីលីពីន បានដូរគោលនយោបាយនៃការនាំចូលអង្ករ ពោល គឺពីការនាំចូលតាមរយៈរដ្ឋ មកឯកជនវិញ៕
ដោយ៖ សហការី
