សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា ដូចគ្នានឹងរាជរដ្ឋាភិបាលអាណត្តិមុនៗដែរ រាជរដ្ឋាភិបាលនីតិកាលទី៧ នៃរដ្ឋសភា ចាត់ទុក «សន្និសីទចក្ខុវិស័យ ប្រទេសកម្ពុជាឆ្នាំ២០២៣» ស្តីពី «ចក្ខុវិស័យ ប្រទេសកម្ពុជាឆ្នាំ២០៣០ និងឆ្នាំបន្តបន្ទាប់ទៀត៖ ការកំណត់មាគ៌ាសម្រាប់វិបុលភាពប្រកបដោយភាពធន់ និរន្តរភាព និងបរិយាបន្ន» ជាវេទិកាមួយដ៏សំខាន់ ដែលផ្តល់ឱកាសឱ្យតួអង្គពាក់ព័ន្ធទាំងអស់ជាពិសេសស្ថាប័នស្រាវជ្រាវ បានពិភាក្សានិងប្តូរយោបល់គ្នាជុំវិញសមិទ្ធផល បញ្ហាប្រឈម និងទិសដៅយុទ្ធសាស្រ្តសម្រាប់ការអភិវឌ្ឍ ដោយផ្តោតសំខាន់លើការអនុវត្តជាក់ស្តែង និងភាពបត់បែនទៅតាមការផ្លាស់ប្តូរនៃបរិការណ៍សាកលនិងក្នុងតំបន់ ដើម្បីអាចនាំនាវាកម្ពុជា ទៅកាន់វិបុលភាពប្រកបដោយភាពធន់ និរន្តរភាព និងបរិយាបន្ន។
សម្ដេចធិបតីបានថ្លែងដូចនេះក្នុងឱកាសដែលសម្ដេចអញ្ជើញជាអធិបតី ក្នុងពិធីបើក «សន្និសីទចក្ខុវិស័យ ប្រទេសកម្ពុជាឆ្នាំ២០២៣» ស្តីពី «ចក្ខុវិស័យ ប្រទេសកម្ពុជាឆ្នាំ២០៣០ និងឆ្នាំបន្តបន្ទាប់ទៀត៖ ការកំណត់មាគ៌ាសម្រាប់វិបុលភាពប្រកបដោយភាពធន់ និរន្តរភាព និងបរិយាបន្ន» ដែលររៀបចំឡើងដោយវិទ្យាស្ថាន CDRI។
សម្តេចធិបតី ហ៊ុន ម៉ាណែត បានគូសបញ្ជាក់ថា ដោយសារប្រធានបទឆ្នាំនេះ ផ្តោតទៅលើការគិតគូរខ្ពស់របស់កម្ពុជា ឆ្ពោះទៅកាន់ឆ្នាំ២០៣០ និងឆ្នាំបន្តបន្ទាប់ទៀត វត្តមានរបស់អ្នកចូលរួមទាំងអស់នៅក្នុងថ្ងៃនេះ បង្ហាញពីការប្តេជ្ញាចិត្តខ្ពស់ក្នុងការអនុវត្តនិងសហការគូសវាងតម្រង់ទិស និងកំណត់ជោគវាសនារបស់កម្ពុជា។
នៅក្នុងឱកាសនោះសម្តេចធិបតី នាយករដ្ឋមន្រ្តីក៏បានលើកឡើងផងដែរថា រាជរដ្ឋាភិបាលក៏បាន រៀបចំគណៈកម្មការជាតិមួយចំនួនផងដែរ ក្នុងនោះគណៈកម្មការជាតិជំរុញការកែទម្រង់សេវាសាធារណៈ, គណៈកម្មការជាតិជំរុញការអនុវត្តវិធានគន្លឹះក្នុងវិស័យអប់រំ, និងគណៈកម្មការជាតិជំរុញការអនុវត្តវិស័យគន្លឹះក្នុងវិស័យសុខាភិបាល។
បន្ថែមពីនេះរាជរដ្ឋាភិបាលក៏បានដាក់ចេញនូវការរៀបចំ នៃកិច្ចដំណើរការរបស់អាជ្ញាធរជាតិដោះស្រាយវិវាទនៅក្រៅប្រព័ន្ធតុលាការផងដែរ៕
ដោយ ៖ សិលា
