សារព័ត៌មាន នគរវត្ត តែងតែនាំមុខគេជានិច្ច
ថ្ងៃមុន ខ្ញុំបាទបានធ្វើដំណើរ ចេញពីរាជធានីភ្នំពេញទៅខេត្តសៀមរាបតាមរថយន្តដឹកអ្នកដំណើររបស់ក្រុមហ៊ុន ឡារីតា ដែលមានរថយន្ត ហ្វ័ដ សម្រាប់ដឹកអ្នកដំណើរ ។ នៅពេលធ្វើដំណើរដល់ខេត្តកំពង់ធំ រថយន្តបានខូច ធ្វើឲ្យភ្ញៀវ ជ្រួលច្របល់ និងសង្ឃឹមថា មានរថយន្តមកផ្លាស់ប្តូរ ដើម្បីអាចឲ្យពួកយើងធ្វើដំណើរដល់ខេត្តសៀមរាបតាមពេលវេលា ដូចដែលបានគ្រោងទុក ។ អង្គុយសំកុកនៅលើចិញ្ចើមផ្លូវអស់រយៈពេល៣ម៉ោង មិនឃើញមានរថយន្តមកជំនួស ឬដឹកនាំពួកយើងទៅគោលដៅនោះឡើយ ។
ក្រុមហ៊ុន ឡារីតា បានធ្វើឲ្យអតិថិជន និយាយឲ្យខ្លីអ្នកធ្វើដំណើរខកចិត្តគ្រប់ៗគ្នា ។ ការរង់ចាំរហូតដល់៥ម៉ោង ទើបមានរថយន្តមកប្តូរ ។ រថយន្តដែលខូចគឺជារថយន្តចាស់ មិនអាចដឹកអ្នកដំណើរ ឲ្យដល់គោលដៅ ។ បើតាមអតិថិជន ដែលខកជើងជាមួយខ្ញុំបាទ អះអាងថា រថយន្តក្រុមហ៊ុនឡារីតា តែងតែមានបញ្ហាយ៉ាងដូច្នេះជាញឹកញាប់ ។ ចួនកាលរថយន្តខូចម៉ាស៊ីនត្រជាក់ ធ្វើឲ្យភ្ញៀវបែកញឹសជោកលើរថយន្ត ។ ទាំងខ្ញុំទាំងគេ បានត្រឹមដើរក្រវែលចុះឡើងក្បែររថយន្ត ដែលខូចនៅម្តុំផ្សារតាំងគោកនោះ ។
ក្នុងនាមជាអ្នកធ្វើដំណើរតាមរថយន្តក្រុមហ៊ុន ឡារីតា ខ្ញុំបាទមានការខកចិត្តជាខ្លាំង ពីព្រោះត្រូវធ្វើដំណើរចូលរួមប្រជុំនៅខេត្តសៀមរាប ដែលតាមការគ្រោងទុក ខ្ញុំបាទគិតថា អាចនឹងសល់ពេលពីរម៉ោង មុនពេលប្រជុំ ខ្ញុំនឹងទៅដល់ ។ ប៉ុន្តែទីបំផុត ខ្ញុំមិនបានចូលរួមប្រជុំនោះឡើយ ។ វាជាការខាតបង់មួយ ដែលមិនគួរក្រុមហ៊ុនធ្វើឲ្យភ្ញៀវ ឬអ្នកធ្វើដំណើរ ខាតបង់ពេលវេលាយ៉ាងដូច្នេះឡើយ ។ ខ្ញុំបាទមិនទាមទារឲ្យសងនូវការខូចខាត ឬបាត់បង់ពេលវេលារបស់ខ្ញុំបាទនោះឡើយ ប៉ុន្តែប្រជាពលរដ្ឋអ្នកធ្វើដំណើរទាំងឡាយ ដែលមានបំណងធ្វើដំណើរតាមរថយន្តរបស់ក្រុមហ៊ុន ឡារីតា គួរពិចារណា ៕ ប្រជាពលរដ្ឋម្នាក់
