សារព័ត៌មាន នគរវត្ត តែងតែនាំមុខគេជានិច្ច
បើទោះបីកិច្ចពិភាក្សា លើកទីពីររវាងប្រធានាធិបតីអាមេរិកដូណាល់ ត្រាំ នឹងមេដឹកនាំកូរ៉េខាងជើង គីម ជុងអ៊ុន មិនទទួលបានជោគជ័យ ប៉ុន្តែមេដឹកនាំទាំងពីរ បានបង្ហាញពីចេតនាពិត ដល់ពិភពលោកបានដឹង ។ កិច្ចព្រមព្រៀង រវាងអាមេរិក នឹងកូរ៉េខាងជើង គឺត្រូវការពេលវេលាបន្ថែមទៀត ទើបអាច ទទួលបានជោគជ័យទាំងស្រុង ។
នៅពេលនេះដែរ ប្រធានាធិបតីអាមេរិក ដូណាល់ ត្រាំបានបង្ហាញពីការប្តេជ្ញា បន្តពិភាក្សាជាមួយកូរ៉េខាងជើង ហើយលោកបានស្នើដល់ប្រធានាធិបតីកូរ៉េខាងត្បូង ម៉ូនជេអ៊ិន ដើរតួជាអាជ្ញាកណ្តាល សម្រាប់ ជំនួបពិភាក្សាជាបន្តទៀត ។
ប្រធានាធិបតីត្រាំ បានបង្ហាញពីការសោកស្តាយ ដែលជំនួបពិភាក្សាលើកទីពីរនៅទីក្រុងហាណូយ មិនទទួលបានជោគជ័យ ។ លោកត្រាំបានបង្ហាញពីការប្តេជ្ញាថានឹងបន្តពិភាក្សាស្វែងរកការរំសាយអាវុធបរមាណូ តាមរយៈការចរចាដោយសន្តិភាព ។
នៅក្នុងជំនួបពិភាក្សាតាមទូរស័ព្ទ រវាងប្រធានាធិបតីដូណាល់ ត្រាំ នឹងម៉ូន ជេអ៊ីន , លោកម៉ូន បង្ហាញក្តីសង្ឃឹមថា កិច្ចពិភាក្សានាពេលខាងមុខ នឹងទទួលបាន លទ្ធផលល្អ ដោយពេលនេះ ភាគីទាំងពីរបានបង្ហាញពីគោលជំហររបស់ខ្លួនច្បាស់លាស់ហើយ។
កន្លងមកមេដឹកនាំកូរ៉េខាងជើង គីម ជុងអ៊ុន បានលើកឡើងថា បើទីក្រុងព្យុងយ៉ាងមិនចង់បោះបង់បរមាណូនោះ លោកក៏មិនមកកាន់ទីក្រុងហាណូយដើម្បីជួបពីភាក្សាជាមួយលោក ត្រាំ នោះដែរ ។
សារព័ត៌មានយ៉ុនហាប់ នាព្រឹកថ្ងៃសុក្រ ទី០១ ខែមីនា ឆ្នាំ២០១៩ បានផ្សាយថា ប្រធានាធិបតីកូរ៉េខាងត្បូងលោក មូន ជេអ៊ីន បានថ្លែងនៅថ្ងៃសុក្រនេះថា ទីក្រុងសេអ៊ូលនឹងរិះរកវិធីគ្រប់បែបយ៉ាង ជាមួយកូរ៉េខាងជើង និងសហរដ្ឋអាមេរិក ដើម្បីស្រោចស្រង់ជំនួបកំពូលរវាងលោក ដូណាល់ ត្រាំ នឹងលោក គីម ជុងអ៊ុន ឡើងវិញក្រោយពីការទទួលបរាជ័យដ៏គួរឲ្យស្តាយបំផុត ក្នុងកិច្ចប្រជុំលើកទីពីរ ដែលបានប្រារព្ធឡើងនៅក្នុងទីក្រុងហាណូយ នៃប្រទេសវៀតណាម។
លោក មូន ជេអ៊ីន បានថ្លែងពីវិមានពណ៌ខៀវ (Blue House) យ៉ាងដូច្នេះថា «ខ្ញុំជឿជាក់ថា វានៅតែជាដំណើរការឆ្ពោះទៅរកកិច្ចព្រមព្រៀងកម្រិតខ្ពស់មួយ…។ ឥឡូនេះតួនាទីរបស់យើង បានវិវឌ្ឍន៍ទៅកាន់តែចាំបាច់ជាងពេលមុនៗ…។ រដ្ឋបាលរបស់ខ្ញុំនឹងធ្វើការងារឲ្យជិតស្និទ្ធជាងមុន ព្រមទាំងការសហការគ្នាជាមួយសហរដ្ឋអាមេរិក និងកូរ៉េខាងជើង ដើម្បីឲ្យកិច្ចពិភាក្សារវាងប្រទេសទាំងពីរ អាចបញ្ចប់ទៅប្រកបដោយផ្លែផ្កា ឡើងវិញ ទោះបីជាក្នុងមធ្យោបាយណាក៏ដោយ…»។
ក្រៅពីការប្តេជ្ញាចិត្តខាងលើនេះ លោក មូន ជេអ៊ីន ក៏បានបញ្ជាក់ផងដែរថា កូរ៉េខាងត្បូងកំពុងតែដោះដូរយោបល់ជាមួយសហរដ្ឋអាមេរិក ដើម្បីរិះរកវិធីដាក់ឲ្យដំណើរការឡើងវិញនូវតំបន់រម្មណីយដ្ឋានភ្នំ គុមហ្គាង (Kumgang) និងតំបន់សេដ្ឋកិច្ចពិសេសកែសុង (Kaesong) ដែលរឿងនេះត្រូវបានគេមើលឃើញថា ជាការជួយសម្រាលបន្ទុកសេដ្ឋកិច្ចកូរ៉េខាងជើង ដែលកំពុងរងគ្រោះខ្លាំងឡើងៗ ដោយសារទណ្ឌកម្មសេដ្ឋកិច្ចពីអន្តរជាតិ។
គួរបញ្ជាក់ថា ជំនួបកំពូល ត្រាំ-គីម លើកទីពីរត្រូវបានធ្វើឡើងរយៈពេលពីរថ្ងៃនៅវៀតណាម ប៉ុន្តែវាបានបញ្ចប់ទៅមុនកាលកំណត់ប៉ុន្មានម៉ោង ព្រោះតែការចរចាមិនត្រូវរ៉ូវគ្នារវាងកូរ៉េខាងជើង និងសហរដ្ឋអាមេរិកតែម្តង។ ភាគីកូរ៉េខាងជើងបានអះអាងថា ខ្លួនចង់បានការដកទណ្ឌកម្មជិតពាក់កណ្តាល ( ៥ លើ ១១) ពីអន្តរជាតិ ជាថ្នូរហ្នឹងការរំលាយតំបន់អភិវឌ្ឍន៍នុយក្លេអ៊ែរ យ៉ុងប្យុន (Yongbyon) តែសហរដ្ឋអាមេរិកមិនយល់ស្របនោះឡើយ ហើយភាគីទាំងពីរក៏មិនបានកំណត់ពេលត្រូវជួបគ្នាលើកទីបីនោះដែរ៕
