សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមការអះអាងពីមជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) បានបញ្ជាក់ថា បុគ្គលដែលបានទទួលវ៉ាក់សាំងកូវីដ-១៩ ពេញលេញ (គ្រប់ដូស) អាចជួបជុំគ្នាក្នុងទម្រង់តូចនៅទីតាំងខាងក្នុងបានដោយមិនចាំបាច់ពាក់ម៉ាស់។ ប៉ុន្តែមិនគួរធ្វើដំណើរក្នុងករណីមិនចាំបាច់ និងបន្តពាក់ម៉ាស់នៅទីសាធារណៈ។ ជាក់ស្ដែងអាជ្ញាធរសុខាភិបាលអាមរិក កាលពីពាក់កណ្តាលខែកុម្ភៈ ឆ្នាំ២០២១ ក៏អនុញ្ញាតឲ្យអ្នកដែលទទួលវ៉ាក់សាំងហើយ អាចមិនចធ្វើចត្តាឡីស័ករយៈពេល១៤ថ្ងៃ បើសិនជាមិនមានរោគសញ្ញា។
មជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក បានសង្កត់ធ្ងន់ថា អ្នកដែលទទួលបានវ៉ាក់សាំងបង្ការជំងឺកូវីដ-១៩ចំនួន២ដូសរួចហើយ អាចជួបជុំទ្រង់ទ្រាយតូចជាមួយអ្នកដែលមិនទាន់បានទទួលវ៉ាក់សាំង និងមិនចាំបាច់ពាក់ម៉ាស់បាន។ ការលើកចោលបម្រាមនេះធ្វើឡើងស្របពេលដែលចំនួនអ្នកដែលទទួលវ៉ាក់សាំងនៅអាមេរិកចាប់ផ្តើមកើនឡើង។ ប៉ុន្តែពួកគេ ត្រូវអនុវត្តតាមការណែនាំឯទៀតផងដែរ។
បេីតាមការលើកឡើងរបស់លោកស្រី Rochelle Walensky នាយក CDC បានគូសបញ្ជាក់ថា៖«អ្នកដែលទទួលវ៉ាក់សាំង និងមិនទាន់ទទួលបានវ៉ាក់សាំង ត្រូវបញ្ចៀសការជួបជុំទ្រង់ទ្រាយមធ្យម និងធំ ដែលរួមមានការធ្វើដំណើរមិនចាំបាច់ផងដែរ»។ លេីសពីនេះលោកស្រីនាយក CDC បន្តថា ប្រជាជនជាង៩០ភាគរយផ្សេងទៀត នៅមិនទាន់ទទួលបានវ៉ាក់សាំងពេញលេញនៅឡើយទេ។
ចំណែកលោក Carlos del Rioព្រឹទ្ធបុរសនៃសាកលវិទ្យាល័យវេជ្ជសាស្ត្រEmory School of Medicine ចំពោះការអនុញ្ញាតឱ្យមានការជួបជុំទ្រង់ទ្រាយតូច និងពុំចាំបាច់ពាក់ម៉ាស់នេះ លោក ចាត់ទុកថាជារឿងសមស្រប។ លោកថាដល់ពេលដែលរដ្ឋាភិបាលត្រូវប្រាប់ពលរដ្ឋឱ្យបានច្បាស់នូវអ្វីដែលអាចធ្វើបាន។
បើតាមទីភ្នាក់ងារព័ត៌មាន Reuters បានចុះផ្សាយថា អាមេរិកបន្តមានអ្នកឆ្លងចំនួន៦ម៉ឺននាក់ជារៀងរាល់ថ្ងៃ ខណៈមានមនុស្សជាង៥២៥,០០០នាក់ស្លាប់ដោយសារជំងឺកូវីដ-១៩។ បន្ទាប់ពីលោក ចូ បៃឌិន ដែលកាន់តំណែងប្រធានាធិបតីអាមេរិក តាំងពីថ្ងៃទី២០ មករាមក បានលើកទឹកចិត្តឱ្យពលរដ្ឋអាមេរិកចាប់ផ្តើមពាក់ម៉ាស់ ក្នុងរយៈពេល១០០ថ្ងៃដំបូងនៃការស្បថចូលតំណែងរបស់លោក។
ដោយឡែកវ៉ាក់សាំង ត្រូវបានពលរដ្ឋអាមេរិកចាត់ទុកជាសង្ឃឹមក្នុងការត្រឡប់ទៅកាន់ស្ថានភាពមុនកើតមានជំងឺកូវីដ-១៩វិញ។ ខណៈដែលវិស័យពាណិជ្ជកម្ម និងបដិសណ្ឋារកិច្ចសង្ឃឹមថា ពលរដ្ឋដែលទទួលបានវ៉ាក់សាំងអាចនឹងចាប់ផ្តើមធ្វើដំណើរ និងចំណាយប្រាក់ច្រើនជាងមុនសម្រាប់ការកំសាន្ត ឬចំណាយប្រាក់លើវិស័យទេសចរណ៍។
សូមជម្រាបថា បេីគិតត្រឹមពេលនេះ ប្រជាជនអាមេរិកប្រមាណ៣០លាននាក់ ឬ៩,២ភាគរយនៃប្រជាជនសរុប ទទួលបានវ៉ាក់សាំងចំនួន២ដូស។ ចំណែកប្រជាជនអាមេរិកប្រមាណ១៨%ឬ៥៨,៩លាននាក់ ទទួលបានវ៉ាក់សាំងចំនួន១ដូស។
គួរបញ្ជាក់ថា អាមេរិកប្រើប្រាស់វ៉ាក់សាំងរបស់ក្រុមហ៊ុន Pfizer, Moderna, និងJohnson & Johnson ។ ខណៈដែលលោកចូ បៃឌិន ក៏បានដាក់ចេញផែនការធ្វើក្នុងការផ្តល់វ៉ាក់សាំងដល់ប្រជាជនចំនួន១០០លាននាក់ ក្នុងរយៈពេល១០០ថ្ងៃដែរ៕
ដោយ៖ស តារា(រូបថត៖NewYork Times)
