សារព័ត៌មាន នគរវត្ត តែងតែនាំមុខគេជានិច្ច
បើទោះបីជាដឹងថា សន្តិសុខមន្ទីរពេទ្យកាល់ម៉ែតចងកសម្លាប់ខ្លួន ដោយសារតែខូចចិត្តចំពោះអង្គភាពរបស់ខ្លួនបញ្ឈប់ពីការងារ ក៏មកដល់ពេលនេះ គ្មានឡើយការស៊ើបអង្កេតដើម្បីរកអ្នកទទួលខុសត្រូវក្នុងរឿងនេះ ។ ខាងមន្ទីរពេទ្យកាល់ម៉ែត បានបញ្ជាក់ថា វាមិនស្ថិតនៅក្រោមការទទួលខុសត្រូវរបស់ខ្លួនទេ គឺខាងក្រុមហ៊ុនសន្តិសុខឯកជនជាអ្នកទទួលខុសត្រូវក្នុងរឿងនេះ ។ ខ្ញុំបាទគិតថា បើនៅស្រុកគេ មុខជាមានការស៊ើបអង្កេតឲ្យបានល្អិតល្អន់ ព្រោះជីវិតមនុស្សមិនមែនស្លាប់ទទេៗ យ៉ាងនេះទេ ។
ខាងសន្តិសុខឯកជនទទួលស្គាល់អំពីការដែលខ្លួនបានផ្លាស់ប្តូរជនរងគ្រោះពីការយាមផ្នែកខាងក្នុងឲ្យមកធ្វើការខាងក្រៅ ។ មិនតែប៉ុណ្ណោះ ថែមទាំងបញ្ជាក់ថា ករណីស្លាប់របស់ឈ្មោះ ឃឹម សុខា មិនពាក់ព័ន្ធនឹងមន្ទីរពេទ្យកាល់ម៉ែតនោះទេ ។ ករណីនេះ វាជាភស្តុតាងមួយដែលបញ្ជាក់ថា មានក្រុមហ៊ុនសន្តិសុខឯកជនជាអ្នកទទួលរ៉ាប់រងមើលការខុសត្រូវលើការងារសន្តិសុខ សណ្តាប់ធ្នាប់ សុវត្ថិភាព និងរបៀបរៀបរយនៅក្នុងមន្ទីរពេទ្យកាល់ម៉ែត ។ លោក ថន ពិសិដ្ឋ ប្រធានក្រុមសន្តិសុខ (ក្រុមហ៊ុនផ្តល់សេវាសន្តិសុខ សណ្តាប់ធ្នាប់ និងរក្សាយានយន្ត) តើមានចុះបញ្ជីត្រឹមត្រូវនៅក្រសួងមហាផ្ទៃឬទេ? ករណីនេះ គួរតែមានការស៊ើបអង្កេតចំពោះក្រុមហ៊ុនរបស់លោក ថន ពិសិដ្ឋ ឲ្យបានស៊ីជម្រៅថា តើវាជាក្រុមហ៊ុន ដែលមានការទទួលខុសត្រូវកម្រិតណា?
ក្នុងនាមប្រជាពលរដ្ឋម្នាក់ ខ្ញុំបាទ គ្រាន់តែប្រាថ្នាចង់ឃើញឲ្យមានការទទួលខុសត្រូវចំពោះមរណភាពខាងលើ ក៏ដូចជាមរណភាពដទៃទៀត ។ ជីវិតមនុស្សមិនមែនត្រូវស្លាប់ទទេៗ ដូចករណីលោក ឃឹម សុខា នេះទេ ។ ជាការពិតហើយ មន្ទីរពេទ្យកាល់ម៉ែតបានបដិសេធចំពោះបញ្ហាផ្ទៃក្នុងរបស់បញ្ហាសន្តិសុខ ដែលខ្លួនបានជួលមកយាមកាមនោះ ។ ដូច្នេះ ក្រសួងមានសមត្ថកិច្ចត្រូវចាប់ផ្តើមស៊ើបអង្កេតពីលោក ថន ពិសិដ្ឋ ដែលជាថ្នាក់ដឹកនាំក្រុមហ៊ុនសន្តិសុខឯកជននេះថា តើមានច្បាប់ទម្លាប់ត្រឹមត្រូវឬទេ? ជាបន្តទៀត ទើបអាចស្រាវជ្រាវរកមូលហេតុនៃការធ្វើអត្តឃាតរបស់លោក ឃឹម សុខា ។ ករណីជីវិតមនុស្សមិនគួរត្រូវបានទុកចោលដោយស្ងាត់ស្ងៀម គ្មានអ្នកទទួលឲ្យពិតប្រាកដយ៉ាងនេះទេ ៕ ប្រជាពលរដ្ឋម្នាក់
