សារព័ត៌មាន នគរវត្ត តែងតែនាំមុខគេជានិច្ច
ហាស់ ហាៗៗៗ … នាយជាលសុំសើចបន្តិចចុះនូវចំណាត់ការចំពោះមន្រ្តីប៉ូលិសពាក់ស័ក្តិ៣ម្នាក់ដែលលួចអាយផេតគេល្បីពេញហ្វេសប៊ុក ហើយបែរជាឆ្លើយថា «ច្រឡំ» ធ្វើឲ្យថ្នាក់លើសម្រាលទោសស្រាលដូចសំឡី និងបកស្រាយខុសទំនង ដែលនេះមិនខុសអីនឹងពាក្យចាស់ថា «និយាយរាក់កំភែលដូចក្តិតលោកនេន» នោះឡើយ។
នាយជាលមិនមែនចង់គាស់វាស់ប្រវែងក្នុងរឿងនេះទេ តែបើមិននិយាយ វាហាក់ដូចជា នៅសង្គមមួយនេះងងឹតពេកហើយ ។ ខ្ញុំចង់ឲ្យអស់លោកជួយពិចារណាទាំងអស់គ្នាក្នុង កាមេរ៉ាសុវត្ថិភាព ស្តីពីសកម្មភាពលោកប៉ូលិសពាក់ស័ក្តិ៣ឈ្មោះ ហេង ហាប់ អាយុ២៤ឆ្នាំ ដែលចូល លួចអាយផេតគេហើយ បែរជាឆ្លើយដោះសាររបៀប ច្រឡំ តើទំនងទេ ? តាមរយៈកាមេរ៉ាសុវត្ថិភាពនេះគេឃើញតាំងពីដំបូង លោកប៉ូលិសម្នាក់នេះចូលទៅក្នុងផ្ទះវីង មានភាពក្រឡេងក្រឡឺមដូចចោរ រហូតលូកដៃយកអាយផេតរបស់ម្ចាស់ផ្ទះទៅបាត់ទាំងខ្លួនគ្មានកាន់អាយភេតមកជាមួយផង តើរឿងអីថាច្រឡំ? អាចថាច្រឡំបានល្គឹកណាគាត់កាន់អាយផេតរបស់គាត់ស្រដៀងអាយផេតម្ចាស់ផ្ទះនោះ តែនេះគ្មានសោះ ។
នាយជាលសុំឲ្យជួយពិចារណាទៀតថា រាល់ការបកស្រាយបែបយករួចខ្លួននិងស្តារការអាម៉ាស់ស្តារកិត្តិយសក្នុងគ្រួសារ ក្នុងចំណុចទី២ថា បន្ទាប់ពីច្រឡំយកអាយផេត ម្តាយរបស់ប៉ូ លិសនេះបានទូរស័ព្ទប្រាប់ម្ចាស់ផ្ទះវិញ សួរថា តើគាត់បានលេខទូរស័ព្ទម្ចាស់ផ្ទះពីណា? បើថាច្រឡំមែន សាមីខ្លួនម៉េចមិនទូរស័ព្ទសុំទោសផ្ទាល់ បែរជាឲ្យម្តាយជំនួសទៅវិញ ?
នៅចំណុចទី២ គេអះអាងថាស្ថានភាពក្នុងគ្រួសារលោកប៉ូលិសនេះធូរធារ ជិះសុទ្ធតែរថយន្តទំនើប Ranger Rover មិនអាចប្រព្រឹត្តអំពើចោរកម្មបានទេ សួរថា ឲ្យតែអ្នកក្រសុទ្ធតែចោរ ហើយអ្នកមានមិនអាចធ្វើចោរបានទេឬ ? តើដែលឃើញអ្នកមានម៉ូតូល្អ ឬមានរថយន្តទំនើបៗជិះ ធ្វើចោរឆក់ ចោរលួច ចោរប្លន់ទេ ? អ្នកជិះឡិចស៊ីស ៥៧០ឬរថយន្តទំនើបផ្សេងៗ សុទ្ធតែមិនអាចធ្វើចោរបានទេឬ?
រីឯត្រង់ចំណុចទី៣ ម្តាយរបស់ប៉ូលិសម្នាក់នេះអះអាងថា កូនរបស់គាត់អាចមានបញ្ហាខួរក្បាល សួរថា ឯណាសំបុត្របញ្ជាក់ជំងឺសរសៃប្រសាទរបស់គ្រូពេទ្យ? បើគាត់មានបញ្ហាខួរក្បាល មែនហេតុអីបណ្តោយឲ្យកាន់អាវុធ ឬបើករថយន្ត ? មិនខ្លាចបាញ់ ឬបើកបុកគេឯងទេឬ? ឬមួយអាងបង្កហេតុហើយសុំទោស ឬច្រឡំដូចករណីនេះ ?
នាយជាល សូមឲ្យជួយពិចារណាទៀតថា ចោរលួចពោត លួចមាន់សោះ ពេលគេចាប់បានវ៉ៃ ដាក់គុកដាក់ច្រវាក់ប្រឈមមុខច្បាប់ ចុះប៉ូលិសម្នាក់នេះដែលគេចាត់ទុកជាមន្ត្រីយុត្តិធម៌ គួរ តែមានតួនាទីជាអ្នកបង្ក្រាបចោរ បែរជាមកធ្វើចោរទៅវិញតើសមមុខទេ? តើគួរឲ្យខូចពូជប៉ូលិសល្អៗឯទៀតទេ ?
និយាយដល់រឿងនេះធ្វើឲ្យនាយជាលនឹកឃើញចម្រៀងមួយបទរបស់លោក ស៊ិន ស៊ីសាមុត និងលោក មាស សាម៉ន គឺបទ« អាចារ្យបាំងឈើ» ដែលមួយឃ្លានោះលោកមាស សាម៉នច្រៀងថា« នែវើយអញ មិនមែនចោរទេ! » ឯលោកស៊ិន ស៊ីសាមុត តបវិញថា «លួចគេថាមិនមែនចោរទៀត…»។ ដូច្នេះនិយមន័យរបស់ចម្រៀងនេះមិនខុសនឹងរឿងលោកប៉ូលិសលួចអាយផេតនេះទេ… ហាស់ ហា ចោរហើយថាមិនមែនចោរទៀត យ៉ាប់ណាស់លោកប៉ូលិសស័ក្តិ៣អើយ ! ៕ នាយជាល
