សារព័ត៌មាន នគរវត្ត តែងតែនាំមុខគេជានិច្ច
ក្នុងនាមប្រជាពលរដ្ឋម្នាក់ ខ្ញុំបាទពិតជាគាំទ្រយ៉ាងពេញទំហឹងចំពោះចំណាត់ការរបស់គណៈកម្មការជាតិបង្ក្រាបបទល្មើសធនធានធម្មជាតិជាពិសេសចំណាត់ការទៅលើក្រុមល្មើសនៅខេត្តមណ្ឌលគិរី ដែលចាត់ទុកជាគំរូ ។ ប៉ុន្តែនៅទីនោះ មិនមានយុត្តិធម៌គ្រប់គ្រាន់ ទាំងឈ្មួញ និងអាជ្ញាធរពាក់ព័ន្ធ ពីព្រោះថា មានជនពាក់ព័ន្ធក្នុងបទល្មើសព្រៃឈើតិចតួចប៉ុណ្ណោះ ដែលត្រូវបានច្បាប់ចាត់ការ ផ្ទុយទៅវិញ អ្នកប្រព្រឹត្តល្មើសជាច្រើនទៀត បែរជារួចខ្លួន និងកំពុងសើចចំអកឲ្យសមត្ថកិច្ច ដែលមានភារកិច្ចបង្ក្រាបបទល្មើសទាំងនោះ ។ ទាំងឈ្មួញ និងអាជ្ញាធរពាក់ព័ន្ធ ក្នុងបញ្ហាបទល្មើស សុទ្ធតែត្រូវបានប្រជាពលរដ្ឋក្នុងខេត្តនេះដឹងគ្រប់គ្នា ។
ឥឡូវនេះមានជនសង្ស័យមួយចំនួនទៀត ត្រូវបានសមត្ថកិច្ចចាប់បញ្ជូនទៅចាត់ការតាមច្បាប់ ។ យ៉ាងហោចណាស់មន្ត្រីនៃមន្ទីរបរិស្ថានម្នាក់ ដែលជានាយកដែនជម្រកសត្វព្រៃភ្នំព្រិច និងមន្ត្រីនៃមន្ទីរកសិកម្មពីររូប ត្រូវគេរាយការណ៍ថា ត្រូវបានសមត្ថកិច្ចឃាត់ខ្លួន ក្នុងសំណុំរឿង បទល្មើសព្រៃឈើនេះ ។ វាជាដំណឹងដែលគួរឲ្យអបអរសាទរ ក្នុងវិធានការជាក់ស្តែង សម្រាប់ការបង្ក្រាបបទល្មើសព្រៃឈើនៅខេត្តមណ្ឌលគិរី ។ ប៉ុន្តែថា តើមានមនុស្សតែប៉ុន្មាននាក់នេះទេឬ ដែលពាក់ព័ន្ធនឹងបទល្មើសព្រៃឈើ ។ ទាំងឈ្មួញ ទាំងសមត្ថកិច្ច នៅខេត្តមណ្ឌលគិរី សុទ្ធតែមានការពាក់ព័ន្ធ ពោលគឺមិនមែនមានមនុស្សតែប៉ុន្មានដែលត្រូវបានចាប់ខ្លួននៅគ្រាកន្លងមកនោះទេ ។ ឈ្មួញដទៃទៀត រួមទាំងសមត្ថកិច្ច នៅក្នុងខេត្តមណ្ឌលគិរី ពោលជនដែលពាក់ព័ន្ធហើយរួចខ្លួន កំពុងសើចចំអកឲ្យសមត្ថកិច្ច ។
ឈ្មួញល្បីឈ្មោះ សារឿន ម៉ាប់ ជាអ្នកដែលរកស៊ី កាប់ និងដឹកជញ្ជូនឈើទ្រង់ទ្រាយធំមិនចាញ់ឧកញ៉ាស៊ឹង សំអុល នោះប៉ុន្មានទេ ។ ដូចគ្នានេះដែរ នាយកដែនជម្រកសត្វព្រៃភ្នំណាំលៀ ក៏បណ្តែតបណ្តោយឲ្យមានបទល្មើស ឬក៏ជាមេខ្លោងចាត់តាំងឲ្យមានបទល្មើស នៃការដឹកជញ្ជូនកាប់បំផ្លាញព្រៃឈើមិនចាញ់ដែនជម្រកសត្វព្រៃភ្នំព្រិចនោះប៉ុន្មានដែរ ។ ពោលគឺ ឈ្មួញសារឿន ម៉ាប់ ក៏ដូចជានាយកដែនជម្រកសត្វព្រៃភ្នំណាំលៀ គឺជាអ្នករៀបចំកសាងរចនាសម្ព័ន្ធ នៃការប្រព្រឹត្តបទល្មើសព្រៃឈើមិនចាញ់ឈ្មួញស៊ឹង សំអុលប៉ុន្មានឡើយ ។ វាជាចម្ងល់សម្រាប់រាស្ត្រទូទៅថា ហេតុអ្វីបានជាទាំងឈ្មួញ សារឿន ម៉ាប់ និងនាយកដែនជម្រកសត្វព្រៃភ្នំណាំលៀ ដែលជាមេធំ ត្រូវនៅក្រៅច្បាប់នៃការបង្ក្រាបបទល្មើសព្រៃឈើនៅខេត្តមណ្ឌលគិរីនោះទៅវិញ ប្រការនេះហើយដែលធ្វើឲ្យគេសើចចំអកចំពោះសមត្ថកិច្ច ឬមួយថា សមត្ថកិច្ចនៃយើងបានសម្របសម្រួល ជាមួយពួកឈ្មួញ និងមន្ត្រីទាំងនោះហើយ?
យុត្តិធម៌ក្រោមមេឃពិតជាមាន??? ទាំងឧកញ៉ា ស៊ឹង សំអុល និងជនដែលកំពុងត្រូវបានឃុំខ្លួនដទៃទៀត ពិតជានឹកគិតថា ជនប្រព្រឹត្តល្មើសដទៃទៀត មិនថានៅខេត្តមណ្ឌលគិរី ឬនៅទីផ្សេងនោះទេ សុទ្ធតែត្រូវបានសមត្ថកិច្ចផ្តន្ទាទោសដូចៗគ្នា ។ ប៉ុន្តែការពិត មិនទាន់ឃើញមានអ្វីដែលជាចំណាត់ការទៅលើអ្នកប្រព្រឹត្តល្មើសផ្សេងទៀតឡើយ ក្រៅតែពីជនពាក់ព័ន្ធក្នុងការប្រព្រឹត្តល្មើសនៅខេត្តមណ្ឌលគិរី ប្រមាណជាង១០នាក់នោះ ។ នេះជាអ្វីដែលគេគិតថា មិនមានយុត្តិធម៌សម្រាប់អ្នកដែលជាប់ឃុំក្នុងរឿងបទល្មើសព្រៃឈើនៅខេត្តមណ្ឌលគិរី ។ មានន័យថា ប្រព្រឹត្តល្មើសដូចគ្នា ហេតុអ្វីបានជាឈ្មួញសារឿន ម៉ាប់ និងមន្ត្រីមានសមត្ថកិច្ចនៅក្នុងតំបន់ណាំលៀ មិនមានទោសកំហុស ។ ប្រការនេះ គឺជាចម្ងល់របស់ខ្ញុំបាទ ក៏ដូចជាប្រជាពលរដ្ឋទូទៅ ពីព្រោះថា ករណីនេះ កំពុងស្ថិតនៅក្នុងការតាមដានយ៉ាងយកចិត្តទុកដាក់ពីសំណាក់ប្រជាពលរដ្ឋទូទៅ រង់ចាំមើលកណ្តាប់ដៃអាជ្ញាធរមានសមត្ថកិច្ចក្នុងការបង្ក្រាបជនដែលពាក់ព័ន្ធក្នុងបញ្ហាបទល្មើសព្រៃឈើ ។
ក៏ប៉ុន្តែអាចនិយាយបានថា បញ្ហាបទល្មើសព្រៃឈើនេះ មិនមែនត្រូវ ខ័ណ្ឌបញ្ចប់ត្រឹមមនុស្សប៉ុន្មាននាក់ ដែលសមត្ថកិច្ចចាប់ខ្លួននៅខេត្តមណ្ឌលគិរីក្នុងរយៈពេលប៉ុន្មានថ្ងៃនេះទេ ។ ទាំងនៅខេត្តមណ្ឌលគិរី ក៏ដូចជារតនគិរី រួមទាំងខេត្តពោធិ៍សាត់ផង មានជនពាក់ព័ន្ធនឹងបញ្ហាបទល្មើស ពោលគឺទាំងឈ្មួញ និងស្ថាប័នជំនាញ ច្រើនទៀត ដែលត្រូវចាប់បញ្ជូនឲ្យតុលាការ ។ ដូច្នេះ ក្នុងនាមប្រជាពលរដ្ឋ ខ្ញុំបាទជឿជាក់ថា អាជ្ញាធរមិនបញ្ឈប់សកម្មភាព ក្នុងការបង្ក្រាប និងនាំយកជនដែលពាក់ព័ន្ធយកមកផ្តន្ទាទោសនោះឡើយ គ្រាន់តែមុននិងក្រោយប៉ុណ្ណោះ ។ ថ្ងៃនេះអ្នកប្រព្រឹត្តល្មើស ដែលមិនទាន់ជាប់គុក ក៏ដូចជាសមត្ថកិច្ចជំនាញមួយចំនួន អាចនៅសើចចំអកឲ្យអ្នកដែលចូលគុកមុននោះបាន ប៉ុន្តែមិនប្រាកដថា អ្នកអាចគេចផុតពីសំណាញ់ច្បាប់ជាដរាបនោះទេ ។ យើងខ្ញុំជាប្រជាពលរដ្ឋគិតថា យុត្តិធម៌នៅក្រោមមេឃពិតជាមាន គ្រាន់តែយូរ និងឆាប់តែប៉ុណ្ណោះ ៕ ប្រជាពលរដ្ឋម្នាក់
