សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សំណល់បរិក្ខារអគ្គិសនី និងអេឡិចត្រូនិកត្រូវបានចាត់ទុកជាសំណល់គ្រោះថ្នាក់ ដោយសំណល់នេះមានផ្ទុកនូវពពួកលោហៈធ្ងន់ ដូចជា៖ អាសេនិក ក្រូម កាត់ម្ញ៉ូម សំណ បារត និងសារធាតុបំពុលសរីរាង្គមិនងាយបំបែកធាតុ ដូចជាសារធាតុធន់នឹងភាពឆេះ និងសារធាតុគ្រោះថ្នាក់ផ្សេងទៀត ដែលអាចបង្កផលប៉ះពាល់ធ្ងន់ធ្ងរដល់សុខភាពមនុស្ស និងបរិស្ថានតាមរយៈការទុកដាក់ ការបោះចោល ការដុត ឬការដោះបំបែកមិនត្រឹមត្រូវតាមលក្ខណៈបច្ចេកទេស។ នេះបេីតាមការបញ្ជាក់ពីក្រសួងបរិស្ថាន បានឱ្យដឹងកាលពីយប់ថ្ងៃសុក្រទី១៦ ខែធ្នូម្សិលមិញនេះ។
ក្រសួងបរិស្ថាន បានឱ្យដឹងទៀតថា ដើម្បីទប់ស្កាត់ពីផលប៉ះពាល់ទាំងនេះ ក្រសួងបរិស្ថានបានរៀបចំលិខិតបទដ្ឋានគតិយុត្ត និងបានកំពុងសហការជាមួយក្រុមហ៊ុន Ecobatt ក្នុងការអនុវត្តគម្រោងប្រមូលសំណល់បរិក្ខារអគ្គិសនី និងអេឡិចត្រូនិកនៅតាមស្ថាប័នរដ្ឋ និងឯកជនយកមកទុកដាក់ឱ្យបានត្រឹមត្រូវ និងប្រកបដោយសុវត្ថិភាពបរិស្ថាន។
នាពេលថ្មីៗនេះ ធនាគារវីងបានប្រគល់សំណល់បរិក្ខារអគ្គិសនី និងអេឡិចត្រូនិក ដល់ក្រុមហ៊ុនEcobatt ប្រមាណ ២តោន ដើម្បីទុកដាក់ត្រឹមត្រូវតាមលក្ខណះបច្ចេកទេសសុវត្ថិភាពបរិស្ថាន។
ជាមួយគ្នានេះ ក្រសួងបរិស្ថាន សូមថ្លែងអំណរគុណដល់ធនាគារវីងដែលបានផ្តល់កិច្ចសហការចូលរួមក្នុងការគ្រប់គ្រងសំណល់បរិក្ខារអគ្គិសនី និងអេឡិចត្រូនិច ហើយក្រសួងក៏សូមអំពាវដល់ស្ថាប័នរដ្ឋ និងឯកជនចូលរួមក្នុងការអនុវត្តគម្រោងគ្រប់គ្រងសំណល់ប្រភេទនេះ៕
ដោយ៖សហការី
