ព័ត៌មានទាន់ហេតុការណ៍៖

លិខិតមិត្តអ្នកអាន៖ កុំវិនិច្ឆ័យសកម្មភាព​មនុស្សតាម​រូបភាព​មួយសន្លឹក

ចែករំលែក៖

ថ្មីៗនេះ ខ្ញុំបាទសង្កេតឃើញ​មានការរិះគន់ជាខ្លាំង​ចំពោះរូបភាព​មន្ត្រីម្នាក់ នៃមន្ទីរសាធារណការ និងដឹកជញ្ជូនខេត្តសៀមរាប ដែលបាន​លើកជើង​ចង្អុលស្លាកលេខរថយន្ត ។ មិនតែប៉ុណ្ណោះ តាមរយៈរូបភាពមួយសន្លឹកនោះ មន្ទីរសាធារណការ និងដឹកជញ្ជូនខេត្តសៀមរាប​ក៏បានសម្រេច​ផ្ទេរស្ត្រីម្នាក់នោះចេញ​ ដោយ​យល់ថា វាជាកំហុសឆ្គង ។ នៅក្នុងបណ្តាញសង្គមហ្វេសប៊ុក បានរិះគន់ចំពោះរូបភាពមួយ​សន្លឹកនោះ និងបានចែករំលែកតគ្នា វាហាក់ដូចជាបានដាក់ទណ្ឌកម្មយ៉ាងខ្លាំងចំពោះ​មន្ត្រី ដែលលើកជើងចង្អុលស្លាកលេខរថយន្តនោះ ។ នៅក្នុងបណ្តាញសង្គម រូបភាពមួយសន្លឹកនេះ ហាក់ដូចជាធ្ងន់ធ្ងរ ដែលអ្នកខ្លះប្រមាថកាតទាន​ដល់ស្ត្រីម្នាក់នោះ ហួសហេតុ ដែលស្ទើរតែមិនអាចទទួលយកបាន ។ កម្សួលនៃការរិះគន់បែបនេះ ទើបធ្វើឲ្យមន្ទីរសាធារណការ និងដឹកជញ្ជូនខេត្តសៀមរាប​សម្រេចផ្ទេរមន្ត្រីម្នាក់នោះចេញពីការងារ ដោយយល់ថា ដើម្បី​បន្ថយ​កំហឹងការរិះគន់ ។

តើត្រឹមត្រូវឬទេ ដែលស្ថាប័នរដ្ឋមួយសម្រេចផ្ទេរមន្ត្រីម្នាក់ ឬដកមន្ត្រីម្នាក់ តាមរយៈរូបភាព​មួយសន្លឹក​ដោយមិនបានសួរនាំ រកខុសត្រូវហេតុផលឲ្យបានច្បាស់លាស់ជាមុននោះ ។ គ្មានចម្លើយ​ពីស្ត្រីម្នាក់នោះទេថា ហេតុអ្វីបានជាគាត់លើកជើង? គ្មានសិទ្ធិឆ្លើយតបទាល់តែសោះ គឺត្រូវ​ថ្នាក់លើរបស់ខ្លួនសម្រេចដក​ និងដាក់ទណ្ឌកម្ម ។ វិធានការនេះ វាហាក់ដូចជាហួសហេតុបន្តិចហើយ នៅក្នុងសង្គមបច្ចុប្បន្ន ដែលគួរណាស់តែមានការសួរនាំឆ្លើយបំភ្លឺ​ឲ្យបានច្បាស់លាស់ មិនមែនសម្រេចចិត្តតាមតែ​ការវាយតម្លៃរបស់មជ្ឈដ្ឋានសង្គមហ្វេសប៊ុក​ដោយមិនផ្តល់សិទ្ធិ​ឲ្យមានការឆ្លើយតបយ៉ាងដូច្នេះទេ ។ រូបភាពនេះ វាពិតជាមានកំហុសធ្ងន់ធ្ងរ​រហូតដល់មិនអាចលើកលែង​ឲ្យបានឬយ៉ាងណា? តើគ្រប់រថយន្ត​ដែលមកបំពាក់ស្លាកលេខនៅមន្ទីរសាធារណការ និងដឹកជញ្ជូនខេត្តសៀមរាប សុទ្ធតែត្រូវស្ត្រីម្នាក់នេះលើកជើងចង្អុលស្លាកលេខនោះឬយ៉ាងណា?

ក្នុងរឿងនេះដែរ រដ្ឋមន្ត្រីក្រសួងព័ត៌មាន​ លោកខៀវ កាញារីទ្ធ បានផ្តល់ជាយោបល់ថា រូបភាពមួយសន្លឹក ដែលគាត់លើកឡើងបែបនេះ វាជាកំហុស ដែលមិនអាចមានការស្រាយបំភ្លឺបានឬយ៉ាងណា? តើគាត់ពិតជាបានលើកជើង​ចង្អុលស្លាកលេខគ្រប់រថយន្តទាំងអស់ឬយ៉ាងណា​? សិទ្ធិដែលបានលើកឡើង​នៅក្នុង​បណ្តាញសង្គមហ្វេសប៊ុក គឺជាការវិនិច្ឆ័យហួសហេតុ ។ បើតាមលោករដ្ឋមន្ត្រី ត្រូវសួរឲ្យបានច្បាស់លាស់រកហេតុផល ដើម្បីឲ្យដឹងការពិត មិនមែន​សម្រេចដកមន្ត្រីម្នាក់​តាមរយៈហ្វេសប៊ុក​នោះទេ ។ លោករដ្ឋមន្ត្រីបានសង្កត់ធ្ងន់ថា «រូបថត​មួយសន្លឹកមិនអាចយកជាការពិតបានទេ» ។ លោកបានបន្ថែមថា ការមិនបានសួរនាំ​ឲ្យបានស៊ីជម្រៅច្បាស់លាស់ គឺជា​«អក្ខរកម្មព័ត៌មាន» និងត្រូវ​រកប្រភពមូលហេតុឲ្យបានច្បាស់លាស់ ។ ការសម្រេច​វិនិច្ឆ័យទៅលើមន្ត្រី​ម្នាក់​តាមរយៈបណ្តាញសង្គមហ្វេសប៊ុក​មិនជារឿងត្រឹមត្រូវទាំងស្រុងនោះឡើយ ។

មានមនុស្សមិនតិចទេក្នុងបណ្តាញសង្គមហ្វេសប៊ុក ច្រើនតែ​«តែៗ ស្ករៗ» ដែល​មិនបាន​មើលឲ្យគ្រប់ជ្រុងនៃបញ្ហា ហើយបានរុញទម្លាក់​កំហុសដោយមិនបានពិចារណាឲ្យគ្រប់ជ្រុងជ្រោយ ។ មិនតែប៉ុណ្ណោះ នៅក្នុងបណ្តាញសង្គម ហាក់ដូចជាបានដាក់គំនាបគាបសង្កត់​ទៅលើ​ស្ត្រីម្នាក់នោះ ដែល​ការអត្ថាធិប្បាយខ្លះ មើលទៅហាក់ដូចជាកំហុសធ្ងន់ធ្ងរ និងប្រសិនបើ​អ្នកប្រព្រឹត្តនោះមិនបានគិតវែងឆ្ងាយ អាចនាំឲ្យមានការធ្វើអត្តឃាតទៀតផង ។ បញ្ហា​នៅក្នុងបណ្តាញសង្គម គឺជារឿងមួយ ប៉ុន្តែ​មន្ទីរសាធារណការ និងដឹកជញ្ជូនខេត្តសៀមរាប គឺជារឿងមួយ មិនមែនត្រូវហៃអើ តែៗ ស្ករៗ តាមហ្វេសប៊ុកនោះឡើយ ។ ផ្ទុយទៅវិញ ត្រូវសួរនាំ ស្រាវជ្រាវរកមូលហេតុ​ ដែលនាំ​ឲ្យមានការរិះគន់ ហើយត្រូវពិចារណាថា តើការរិះគន់នោះ មានហេតុផលត្រឹមត្រូវឬទេ? កុំឲ្យដូចការរិះគន់​ប៉ុន្មានថ្ងៃមុនដែលថា អក្សរសរសេរនៅលើរថយន្តសង្គ្រោះបន្ទាន់ បញ្ច្រាស ខុសនោះ វាជារឿងគួរឲ្យខ្មាស់អៀនណាស់ ៕ ប្រជាពលរដ្ឋម្នាក់


ចែករំលែក៖