បាតុកម្មនៅលីបង់ មិនទាន់មានសញ្ញាបញ្ចប់នៅឡើយទេ

ប្រជាពលរដ្ឋលីបង់ បានធ្វើបាតុកម្ម នៅទូទាំងប្រទេស អស់រយៈពេលជាច្រើនសប្ដាមកហើយដោយគួបផ្សំនឹងការរឹតបន្ដឹងនូវការធ្វើចរាចរណ៍ប្រាក់ដុល្លារថែមទៀតផង ទើបធ្វើឲ្យប្រទេសនេះ​ ប្រឈមនឹងកង្វះខាតប្រេងឥន្ធនៈប្រើប្រាស់។

ម្ចាស់ស្ថានីយប្រេងឥន្ធនៈជាច្រើន នៅក្នុងរដ្ឋធានីប៉េរូត បានឲ្យដឹងថា ពួកគាត់​នឹងមិនបញ្ជាទិញប្រេងចូលបន្ដទៀតទេ ព្រោះនៅពេលនេះ រដ្ឋាភិបាល​បានរឹតបន្ដឹងនូវការធ្វើចរាចរណ៍ប្រាក់​ដុល្លារ។ រីឯបញ្ហាកង្វះខាតប្រេងឥន្ធនៈនេះ បានកើតឡើង ​ដោយសារមានវិបត្ដិហិរញ្ញវត្ថុ និងការផ្ទុះឡើងនូវបាតុកម្ម នៅទូទាំងប្រទេសលីបង់។

បើយោងតាមទីភ្នាក់ងារ NNA (The National News Agency ) ដែលគ្រប់គ្រងដោយរដ្ឋ បានរាយការណ៍ថា​ ស្ថានីយប្រេងឥន្ធនៈជាច្រើន នៅក្នុងរដ្ឋធានីប៉េរូត បានបិទអាជីវកម្មរបស់ពួកគេ ចាប់តាំងពីថ្ងៃសៅរ៍ ទី៩ ខែវិច្ឆិកា មកម៉្លេះ។ រីឯស្ថានីយខ្លះទៀត បានលក់ប្រេងចេញអស់ រហូតធ្វើឲ្យអ្នកប្រើប្រាស់យានយន្ដ ពិបាករកកន្លែងចាក់សាំង។

សេចក្ដីរាយការណ៍ដដែល បានបន្ដថា ស្ថានីយភាគច្រើនបំផុត នៅក្នុងខេត្ត Akkar ក៏ត្រូវបានបិទទ្វារផងដែរ។ វិបត្តិប្រេងសាំង បានចាប់ផ្ដើមកើតឡើង នៅក្នុងខេត្តនេះ ហើយវាក៏កំពុងគំរាមកំហែង​ដល់សកម្មភាពប្រចាំថ្ងៃ នៅក្នុងខេត្តថែមទៀតផង។ ជាមួយគ្នានេះដែរ បណ្ដាទីក្រុង និងខេត្ដនានា នៅភាគខាងកើតប្រទេស ក៏កំពុងតែប្រឈមនឹងការខ្វះខាតប្រេងប្រើ​ប្រាស់ផងដែរ។ ស្របពេលនេះ ក្រុមឈ្មួញមួយចំនួន ក៏ឆ្លៀតពេលដំឡើងថ្លៃសាំង ខុសពីតម្លៃធម្មតា ចំនួន២៥សេនថែមទៀតផង។

ប្រទេសលីបង់ បានប្រឈមមុខនឹងការដោះស្រាយបំណុលរបស់បរទេស​ជាង៨០ពាន់លានដុល្លារអាមេរិក និងជំនួយបរទេស។ រីឯរដ្ឋាភិបាល ក៏បានមានផែនការ​កាត់បន្ថយនូវឱនភាពថវិកា និងដំឡើងពន្ធទៅលើផលិតផលនានា រួមមាន ថ្នាំជក់ តម្លៃប្រេងសាំង និង កម្មវិធីផ្ញើសារ Whatsapp ។ ដោយសារតែបញ្ហានេះ ទើបធ្វើឲ្យប្រជាពលរដ្ឋលីបង់ ផ្ទុះបាតុកម្ម នៅទូទាំងប្រទេស។ រហូតមកដល់ពេលនេះ បើទោះជានាយករដ្ឋមន្រ្ដី សុខចិត្តលាលែងពីតំណែងទៅហើយក្ដី ក៏ក្រុមបាតុករ នៅតែមិនព្រមបញ្ឈប់តវ៉ាដដែល៕