សារព័ត៌មាន នគរវត្ត តែងតែនាំមុខគេជានិច្ច
សារព័ត៌មានSputnik នៅថ្ងៃទី៣ខែធ្នូ បានផ្សាយថា ចិនកំពុងពិចារណា កាត់បន្ថយការផ្តល់ទិដ្ឋាការ ដល់មន្ត្រីអាមេរិក ដែលជាប់ពាក់ព័ន្ធ បញ្ហាស៊ីនជាំង និង ហុងកុង ។ សកម្មភាពខាងលើរបស់ចិនកើតឡើងក្រោយពេលដែល តំណាងរាស្ត្រអាមេរិកបោះឆ្នោតគាំទ្រលោកត្រាំ និងរដ្ឋាភិបាលវាយតម្លៃជាប្រចាំ និងដាក់ទណ្ឌកម្មចិនដែលបំពានច្បសប់សិទ្ធិមនុស្សនៅទីនោះ។
តាំងពីដើមមក អាមេរិកតែងតែចោទប្រកាន់ ចិនរំលោភបំពានសិទ្ធិមនុស្ស នៅតំបន់គ្រប់គ្រងស្វាយភាព ក្នុងនោះមាន ស៊ីនជាំង ទីបេ ហុងកុង ជាដើម។ ប៉ុន្តែអ្នកឯកទេសវិភាគបានលើកឡើងថា សកម្មភាពរបស់អាមេរិកគឺ អ៊ុកឡុងបញ្ហាផ្ទៃក្នុង កោះកកាយផ្ទៃក្នុង ឲ្យបះបោរ ដើម្បីរដ្ឋាភិបាលចិនផ្តោត ដោះស្រាយបញ្ហាផ្ទៃក្នុងច្រើនជាងនៅខាងក្រៅ។
ជាមួយគ្នានោះដែរក្រសួងការបរទេសចិន កាលពីថ្ងៃទី២ខែធ្នូបានប្រកាស ហាមប្រាមជាដាច់ខាតរាល់យន្តហោះ ចម្បាំង នាវាចម្បាំង ក៏ដូចជាមន្ត្រីយោធា ទស្សនកិច្ចទៅកាន់ហ៊ុងកុង។ ជាមួយគ្នានោះចិនក៏បានថ្កោលទោសដល់អាមេរិក និងដាក់ទណ្ឌកម្មទៅ ដល់បណ្តាអង្គការជាប់ពាក់ព័ន្ធនឹងសកម្មភាពហិង្សា ដោយបាតុកម្មនៅហុងកុង។
ការប្រកាសរបស់ក្រសួងការបរទេចិន កាលពីថ្ងៃទី២ខែធ្នូ គឺជាការឆ្លើយតបទៅនឹងច្បាប់ស្តីពីសិទ្ធិមនុស្ស របស់អាមេរិក នៅកោះហុងកុងដែល លោកត្រាំ បានចុះហត្ថលេខាកាលពីសប្តាហ៍កន្លងមក។ ក្រសួងការបរទេសចិន បានផ្អាក់ទាំងស្រុងរាល់ដំណើរទស្សនកិច្ច របស់មន្ត្រីយោធាអាមេរិក ក៏ដូចជា កម្លាំងទាហាន ជើងទឹកជើងអាកាសទៅកាន់កោះហុងកុង។ អ្នកនាំពាក្យក្រសួងការបរទេសចិនបានអំពាវនាវឲ្យរដ្ឋាភិបាលទីក្រុង វ៉ាស៊ីនតោន កែប្រែនៅកំហុសរបស់ខ្លួន ដោយឈប់ជ្រៀតជ្រែកកិច្ចការផ្ទៃក្នុងរបស់ចិន។
ក្រសួងការបរទេសចិនក៏បានប្រកាសថា នឹងអនុវត្តវិធីសាស្ត្រចាំបាច់ដើម្បីរក្សាសន្តិសុខ ស្ថេរភាពនៅកោះហុងកុង ដែលស្ថិតនៅក្នុងដែនអធិបតេយ្យរបស់ចិន។
ក្រុមអ្នកឯកទេសលើកឡើងថា អាមេរិកកំពុងតែប្រើប្រាស់កោះហុងកុងដើម្បីវាយប្រហារទៅលើចិនដីគោក ទាំងនោះជាយុទ្ធសាស្ត្ររបស់អាមេរិក ដើម្បីទប់ទល់ ការពង្រីកឥទ្ថិពលរបស់ចិន អាចក្លាយទៅជាមហាអំណាច យោធានិងសេដ្ឋកិច្ចនៅលើពិភពលោក ។ បច្ចុប្បន្ន ចិន ជាមហាអំណាចការទូត ខ្លាំងជាងគេបំផុតលើពិភពលោក នាំមុខអាមេរិក។
តាមរយៈសេចក្តីថ្លែងការណ៍ពីក្រុងប៉េកាំង រដ្ឋអំណាចចិន យល់ឃើញថា ឧត្តមស្នងការសិទ្ធិមនុស្សរបស់អង្គការសហប្រជាជាតិ លោកស្រី Michelle Bachelet បានប្រព្រឹត្តកំហុស និងបានជ្រៀតជ្រែកលូកដៃកកូរកកាយកិច្ចការផ្ទៃក្នុងរបស់ចិន។ ប្រតិកម្មវាយបករបស់រដ្ឋបាលក្រុងប៉េកាំងយ៉ាងដូច្នេះ គឺបន្ទាប់ពីលោកស្រីបានជំរុញឲ្យរដ្ឋបាលហុងកុងបើកការអង្កេតចំពោះហិង្សារបស់ប៉ូលីសទៅហ្វូងបាតុករ។
តាមការផ្សាយរបស់កាសែត The South China Morning Post គឺឧត្តមស្នងការសិទ្ធិមនុស្សរបស់អង្គការសហប្រជាជាតិ លោកស្រី Michelle Bachelet បានធ្វើរឿងមិនសមរម្យ ហើយរដ្ឋអំណាចចិនយល់ថាលោកស្រីបានធ្វើកំហុស ដោយបានជ្រលក់ដៃជ្រៀតជ្រែកកិច្ចការផ្ទៃក្នុងរបស់រដ្ឋបាលក្រុងប៉េកាំង។ របបទីក្រុងប៉េកាំង ប្រតិកម្មដូច្នេះ ដោយសំអាងទៅលើគោលការណ៍មិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ ដែលមានចែងនៅក្នុងធម្មនុញ្ញរបស់អង្គការសហប្រជាជាតិ។
សូមរម្លឹកជូនថា ឧត្តមស្នងការសិទ្ធិមនុស្សរបស់អង្គការសហប្រជាជាតិ លោកស្រី Michelle Bachelet បានថ្លែងពីក្រុងហ្សឺណែវប្រទេសស្វីស ពីថ្ងៃសៅរ៍ម្សិលមិញនេះ ដោយលោកស្រីជំរុញអាជ្ញាធរហុងកុងបើកការស៊ើបអង្កេតឲ្យឯករាជ្យយុត្តិធម៌ ចំពោះសំណុំរឿងហិង្សាដែលប៉ូលីសហុងកុងបានធ្វើជ្រុលជ្រួសលើក្រុមបាតុករ ហើយការអង្កេតនេះ ត្រូវដឹកនាំដោយចៅក្រមដែលមានភាពអព្យាក្រឹត្យ។
ដោយសារតែការលើកឡើងបែបនេះហើយ ទើបរបបកុម្មុយនីស្តចិន យល់ឃើញថា លោកស្រីឧត្តមស្នងការសិទ្ធិមនុស្សរបស់អង្គការសហប្រជាជាតិ មានការខុសឆ្គងចំពោះសម្តីរបស់ខ្លួន ហើយសម្តីនេះ គឺនឹងបញ្ឆេះកំហឹង ព្រមទាំងជំរុញទឹកចិត្តដល់ហ្វូងបាតុករហុងកុង ឲ្យកាន់តែផុសផុលឡើង ងើបឡើងប្រឆាំងនឹងរដ្ឋអំណាច។
មកដល់ខែធ្នូ ២០១៩នេះ គឺជាគម្រប់ខែទី៦ហើយ ដែលបាតុករហុងកុងចុះផ្លូវតវ៉ាស្រែកទាមទារសេរីភាព និងប្រជាធិបតេយ្យ ប្រឆាំងនឹងរដ្ឋបាលហុងកុងដែលរណបចិនប៉េកាំង។ ក្នុងការបោះឆ្នោតថ្នាក់មូលដ្ឋាន ប៉ុន្មានថ្ងៃមុននេះ ក្រុមគណបក្សខាងអ្នកប្រជាធិបតេយ្យ បានឈ្នះសំឡេងច្រើនសន្ធឹក។ ថ្ងៃអាទិត្យនេះទៀត មានមនុស្សខាប់ដូចទឹកគ្រឿង ទាំងចាស់ទាំងក្មេង ច្រើនកុះករបានផ្តុំគ្នាធ្វើបាតុកម្ម។ ក៏ប៉ុន្តែ ទាំងក្រុងប៉េកាំង និងរដ្ឋបាលស្វ័យតហុងកុង តែងចោទក្រុមបាតុករថា កំពុងតែធ្វើកុប្បកម្ម ហិង្សា ហើយ និងកំពុងធ្វើ«បដិវត្តន៍ពណ៌» ដែលនេះគឺបានទទួលឥទ្ធិពលមនោគមន៍វិជ្ជាពីបរទេស ហើយប្រុងតែនឹងបង្កអស្ថិរភាពដល់ការដឹកនាំរបស់ប៉េកាំង និងហុងកុង៕
