សារព័ត៌មាន នគរវត្ត តែងតែនាំមុខគេជានិច្ច
ក្នុងនាមប្រជាពលរដ្ឋមួយរូបដែលមិនទាន់មានរថយន្តជិះនឹងគេ ចេះតែឆ្ងល់រឿងគេនាំគ្នាយករថយន្តទៅឈៀក ដើម្បីកុំឲ្យសមត្ថកិច្ចផាកពិន័យ។ តើការឈៀកមានសារប្រយោជន៍អ្វីខ្លះ? ក្រៅតែពីយកលុយឲ្យក្រុមហ៊ុនឈៀក ដែលធ្វើការជាមួយក្រសួងសាធារណការនោះ? សារសំខាន់តែមួយមាត់គត់ គឺរួមចំណែកកាត់បន្ថយគ្រោះថ្នាក់ចរាចរណ៍ នៅលើដងផ្លូវ។ ប៉ុន្តែរថយន្តដឹកទឹកកកដែលទ្វារដាច់រណេងរណោងយកខ្សែចងទប់ ដែលមានបិទឈៀកនៅនឹងកញ្ចក់រថយន្តនោះតើមានន័យយ៉ាងម្តេច?
រថយន្តដែលបានឈៀកហើយ ត្រូវបានគេបិទប័ណ្ណសម្គាល់ឈៀកនៅកញ្ចក់ រថយន្តខាងមុខ។ វាគ្រាន់តែជាក្រដាសមួយសន្លឹក ដែលបញ្ជាក់ថា រថយន្តនេះបានឈៀករួចហើយ។ ប៉ុន្តែតើរថយន្តនេះមានលក្ខណបច្ចេកទេសគ្រប់គ្រាន់ត្រឹមត្រូវតាមស្តង់ដារ ឬនៅនោះ មិនមែនតាមរយៈការឈៀករួចហើយ រថយន្តអាចមានលក្ខណសម្បត្តិគ្រប់គ្រាន់ ទាំងលក្ខណៈបច្ចេកទេសអាចបើកបរបាននៅលើដងផ្លូវបាននោះឡើយ។ ការ ឈៀកគ្រាន់តែដើម្បីឲ្យដឹងថា រថយន្តមានបញ្ហាបច្ចេកទេសដូចជា ហ្វ្រាំង, ភ្លើង, កង់… ប៉ុន្តែម្ចាស់រថយន្តត្រូវយករថយន្តទៅធ្វើនៅកន្លែងផ្សេងទៀត។ ដូច្នេះមានន័យថា ការ ឆៀកគ្រាន់តែដើម្បីដឹងអំពីបញ្ហាគ្រឿងគ្រៅរបស់រថយន្តតែប៉ុណ្ណោះ។ ទីបំផុតម្ចាស់ រថយន្តត្រូវយករថយន្តទៅជួសជុល ឬធ្វើនៅយានដ្ឋានដដែល មិនមែនទៅឈៀក ហើយរថយន្តត្រឹមត្រូវតាមស្តង់ដារនោះទេ។
តាមខ្ញុំបាទគិតមើល ឆៀកគ្រាន់តែជាក្រដាសមួយសន្លឹក ដែលបិទនៅកញ្ចក់រថយន្ត ផ្នែកខាងមុខ ដើម្បីកុំឲ្យនគរបាលផាកពិន័យតែប៉ុណ្ណោះ។ វាមិនមែនជាការបំពេញការខ្វះខាត ផ្នែកបច្ចេកទេសណាមួយរបស់រថយន្តនោះទេ។ ផ្ទុយទៅវិញ វាគឺជាបច្ចេកទេសរក ប្រាក់សុទ្ធសាធរបស់ជំនាញសាធារណការ។ ខ្ញុំបាទបានឃើញរថយន្តដឹកទឹកកកដែល មានទ្វារដាច់រញ៉េរញ៉ៃ គ្មានកញ្ចក់មើលក្រោយ, គ្មានភ្លើងបំភ្លឺ… ប៉ុន្តែគាត់មានបិទឈៀក នៅនឹងកញ្ចក់ខាងមុខអ្នកបើកបរ។ តើសមត្ថកិច្ចផាកពិន័យគាត់ ឬយ៉ាងដូចម្តេច? តាមលក្ខណៈបច្ចេកទេសរថយន្តដឹកទឹកកក ស្ទើរតែទាំងអស់ មិនបានបំពេញលក្ខខណ្ឌ និងស្តង់ដារត្រឹមត្រូវនោះទេ។ ផ្ទុយទៅវិញរថយន្តបែបនេះ ត្រូវគេឃើញបើកបរពេញ ផ្លូវក្នុងរាជធានីភ្នំពេញ។ ជួលកាលរថយន្តនោះខូចនៅកណ្តាលផ្លូវ បណ្តាលឲ្យកកស្ទះចរាចរណ៍ រាប់ម៉ោងក៏មាន។ នៅពេលដែលគេឈ្ងោកមើលកញ្ចក់រថយន្តឃើញរថយន្តដឹកទឹកកក ដែលខូចនោះមានបិទឈៀកទៀតផង។
រថយន្តធំៗដែលជួនកាលដាច់កង់ បណ្តាលឲ្យមានគ្រោះថ្នាក់នៅលើដងផ្លូវ ក៏ មានបិទឈៀកនៅលើកញ្ចក់ដែរ។ ប៉ុន្តែទីបំផុតនៅតែមានអ្នកស្លាប់ ដោយសាររថយន្ត ដែលមានបិទឈៀកនោះដដែល។ ដូច្នេះថ្នាក់ដឹកនាំក្រសួងសាធារណការ គួរពន្យល់ អំពីសារសំខាន់នៃការឈៀករថយន្តនោះឲ្យបានច្បាស់លាស់? បើឈៀករួចហើយម្ចាស់រថយន្តមិនយករថយន្តខ្លួនទៅជួសជុល តើការឈៀកនោះមានសារសំខាន់បែបណា? វាគ្រាន់តែធ្វើឡើងដើម្បីចែកលុយគ្នា រវាងពួកមន្រ្តីសាធារណការ និងក្រុមហ៊ុនដែល ម៉ៅការឆៀកនោះទេដឹង? ក្រសួងសាធារណការគួរពន្យល់ឲ្យច្បាស់លាស់ថារថយន្ត ចាស់ៗបើកជ្រុះកង់, ដាច់ទ្វារកណ្តាលផ្លូវ… ដែលមានបិទឈៀកនៅនឹងកញ្ចក់ខាងមុខ នោះ វាយ៉ាងដូចម្តេច? រថយន្តទាំងនោះសុទ្ធតែបានឈៀកប៉ុន្តែលក្ខណបច្ចេកទេស គឺមិនបានជួសជុលឲ្យបានត្រឹមត្រូវនោះទេ៕ ប្រជាពលរដ្ឋម្នាក់
