សារព័ត៌មាន នគរវត្ត តែងតែនាំមុខគេជានិច្ច
បាតុកម្មនៅប្រទេសឥណ្ឌាបានផ្ទុះឡើងតាំងពីថ្ងៃទី១៤ ខែធ្នូ ប្រឆាំង នឹងច្បាប់ សញ្ជាតិ ថ្មីក្លាយទៅជាហិង្សា បណ្តាលឲ្យមានអ្នកស្លាប់រាប់សិបនាក់ និងរាប់រយនាក់ រងរបួស ។ ក្រៅពីនេះនៅមានអ្នកបាតុករជាច្រើនត្រូវបានចាប់ខ្លួន ។ ច្បាប់សញ្ជាតិថ្មីអាចបង្កឲ្យក្រុមជនជាតិអ៊ីស្លាមនៅឥណ្ឌារាប់លាននាក់ត្រូវបាត់សញ្ជាតិ ។
ទាំងនោះហើយបានជាក្រុមជនជាតិអ៊ីស្លាមនៅឥណ្ឌានាំគ្នាធ្វើបាតុកម្ម ។ នៅពេលនេះ នាយករដ្ឋមន្រ្តីឥណ្ឌាលោកម៉ូឌីថា ច្បាប់សញ្ជាតិថ្មីមិនមែនសំដៅប្រឆាំងអ្នកកាន់សាសនាអ៊ីស្លាមទេ ។ កាលពីថ្ងៃទី ទី២២ ធ្នូ នាយករដ្ឋមន្រ្តីឥណ្ឌាលោកណារិនដ្រា ម៉ូឌីបានព្យាយាមរំងាប់ភាពតានតឹងដោយធានាថា ច្បាប់សញ្ជាតិថ្មីដែលសភាបានអនុម័តកាលពីថ្ងៃទី១១ ធ្នូគ្មានការរើសអើងសាសនា ហើយក៏មិនមែនសំដៅប្រឆាំងនឹងអ្នកកាន់សាសនាអ៊ីស្លាមដែរ ។
តាមលោកម៉ូឌី ពលរដ្ឋអ្នកកាន់សាសនាអ៊ីស្លាមដែលកើតក្នុងទឹកដីឥណ្ឌាមិនត្រូវបារម្ភពីច្បាប់សញ្ជាតិថ្មីនោះទេ ។ ការថ្លែងរបស់លោកម៉ូឌីពេលនេះបានធ្វើឡើង បន្ទាប់ពីមានបាតុកម្មយ៉ាងហិង្សាប្រឆាំងនឹងច្បាប់មួយនេះតាំងពី ១០ថ្ងៃមកហើយ ។ បាតុកម្មដែលគិតត្រឹមថ្ងៃអាទិត្យ ទី២២ ធ្នូបានបណ្តាលឲ្យមានមនុស្សស្លាប់យ៉ាងតិច ២៥នាក់ ។
លោកណារិនដ្រា ម៉ូឌី នៅចំពោះមុខក្រុមសកម្មជននៃគណបក្សជាតិនិយមហិណ្ឌូបានលើកឡើងថា« ខ្ញុំចង់ធានាចំពោះមុខពលរដ្ឋអ្នកកាន់សាសនាអ៊ីស្លាមទាំងអស់នៅឥណ្ឌាថា ច្បាប់សញ្ជាតិថ្មីគ្មានអ្វីផ្លាស់ប្តូរសម្រាប់ពួកគេទេ ហើយរដ្ឋាភិបាលនឹងព្យាយាមអនុវត្តកំណែទម្រង់របស់ខ្លួនដោយគ្មានការរើសអើងសាសនា » នេះ ។ លោកម៉ូឌីបានបញ្ជាក់បន្ថែមច្បាស់ៗថា អ្នកកាន់សាសនាអ៊ីស្លាមគ្រប់រូបដែលចាប់កំណើតលើទឹកដីឥណ្ឌាមិនត្រូវព្រួយបារម្ភនឹងច្បាប់សញ្ជាតិថ្មីទេ ។ ការចេញមុខធានារបស់លោកម៉ូឌីបានធ្វើឡើង បន្ទាប់ពីមានបាតុកម្មប្រឆាំងនឹងច្បាប់មួយនេះពីសំណាក់ពលរដ្ឋឥណ្ឌាភាគច្រើន ពិសេសអ្នកកាន់សាសនាអ៊ីស្លាម ។
គួររម្លឹកថា ច្បាប់សញ្ជាតិថ្មីត្រូវបានសភាអនុម័តកាលពីថ្ងៃទី១១ ធ្នូ និងចាប់តាំងពីថ្ងៃនោះមក ក្បួនបាតុកម្មបានបន្តរហូតមកដល់ពេលនេះដោយបណ្តាលឲ្យមានមនុស្សស្លាប់យ៉ាងតិច ២៥នាក់ និងមានជាង ១ ៥០០នាក់ត្រូវបានប៉ូលិសចាប់ខ្លួន ។ បាតុកម្មជាទូទៅច្រើនជាបាតុកម្មអហិង្សា តែពេលខ្លះមានការប្រឈមមុខដាក់គ្នាយ៉ាងហិង្សារវាងបាតុករ និងកម្លាំងប៉ូលិសរហូតមានការគប់ដុំថ្ម និងដុតឡាន ។ Uttar Pradesh ស្ថិតប៉ែកខាងជើងប្រទេសជារដ្ឋដែលមានភាពពុះកញ្រ្ជោលខ្លាំងជាងគេ ។ រដ្ឋនេះមានមនុស្សរស់នៅច្រើនជាងគេរហូតដល់ទៅ ២០០លាននាក់ ក្នុងនោះមាន ២០% ជាអ្នកកាន់សាសនាអ៊ីស្លាម ។ នៅឥណ្ឌា ក្នុងចំណោមពលរដ្ឋទាំង ១ ៣០០លាននាក់ មានអ្នកកាន់សាសនាអ៊ីស្លាមប្រមាណជា ២០០លាននាក់ ។
រដ្ឋាភិបាលបានបញ្ជាក់ថា ច្បាប់សញ្ជាតិថ្មីជារឿងចាំបាច់ដើម្បីជួយសម្រួលដល់ការផ្តល់សញ្ជាតិឥណ្ឌាឲ្យជនជាតិភាគតិចមិនមែនអ៊ីស្លាមដែលបានភៀសខ្លួនមកពីប្រទេសអាហ្វហ្កានីស្ថាន បង់ក្លាដែស ឬប៉ាគីស្ថាននៅមុនឆ្នាំ ២០១៥ ។ តែពលរដ្ឋឥណ្ឌាភាគច្រើនយល់ឃើញថា ច្បាប់សញ្ជាតិថ្មីមួយនេះមានការរើសអើងចំពោះអ្នកកាន់សាសនាអ៊ីស្លាម ។ គេនៅមិនទាន់ដឹងថា តើអន្តរាគមន៍របស់លោកម៉ូឌីពេលនេះអាចរំងាប់ភាពបះបោរ ឬអត់ទេ ។ អ្វីដែលគេដឹង វិបត្តិសង្គមមួយនេះបានផ្ទុះឡើង ខណៈដែលឥណ្ឌាកំពុងមានកំណើនអ្នកអត់ការងារធ្វើ និងមានកំណើនសេដ្ឋកិច្ចទាបបំផុត គិតតាំងពី ៦ឆ្នាំកន្លងមក ។
កន្លងមក ដំណើរការជំរឿនប្រកបដោយភាពចម្រូចសម្រាសខ្លាំងទើបបានបិទបញ្ចប់នៅក្នុងរដ្ឋអាសាមស្ថិតភាគឦសានប្រទេស ។ កម្មវត្ថុនៃការធ្វើជំរឿននេះ គឺស្វែងរកអត្តសញ្ញាណជនអន្តោប្រវេសន៍ខុសច្បាប់មកពីប្រទេសបង់ក្លាដែស និងដែលបន្ទាប់មក ពួកគេបានទទួលសញ្ជាតិឥណ្ឌា ។ ស្ថាប័នទទួលបន្ទុកធ្វើជំរឿនបានផ្សព្វផ្សាយសេចក្តីប្រកាសព័ត៌មានផ្លូវការមួយបានបញ្ជាក់ថា មានមនុស្សជិត ២លាននាក់អាចប្រឈមនឹងការបាត់បង់សញ្ជាតិឥណ្ឌា ហើយពួកគេមានសិទ្ធិតវ៉ានៅតុលាការដើម្បីអាចរក្សាសញ្ជាតិឥណ្ឌារបស់ពួកគេបាន ។
សេចក្តីប្រកាសព័ត៌មានផ្លូវការផ្សព្វផ្សាយ ឲ្យដឹងថា មានមនុស្សចំនួន ៣១ ១០០ ០០០នាក់ត្រូវបានចុះក្នុងបញ្ជីជាតិពលរដ្ឋ និងមាន ១ ៩០០ ០០០នាក់ផ្សេងទៀតដែលភាគច្រើនជាអ្នកកាន់សាសនាអ៊ីស្លាមមិនមាននៅក្នុងបញ្ជីជាតិនោះទេ ។ គឺមនុស្សទាំង ១ ៩០០ ០០០នាក់នេះហើយដែលកំពុងប្រឈមនឹងការបាត់បង់សញ្ជាតិឥណ្ឌា ព្រោះពួកគេមិនអាចបង្ហាញភស្តុតាងដែលបញ្ជាក់ថា គ្រួសាររបស់ពួកគេជាជនជាតិឥណ្ឌានៅមុនខែមេសា ឆ្នាំ ១៩៧១ ។ ជម្រើសយកឆ្នាំ ១៩៧១ ជាលក្ខខណ្ឌសម្រាប់រដ្ឋអំណាចក្នុងរដ្ឋអាសាមមិនមែនជាជម្រើសចៃដន្យទេ ព្រោះជាឆ្នាំដែលមានជនភៀសខ្លួនមកពីប្រទេសបង់ក្លាដែសក្បែរខាងរត់ទៅរស់នៅក្នុងរដ្ឋអាសាម ។
រដ្ឋអំណាចក្នុងរដ្ឋអាសាមបានបញ្ជាក់ថា មានជនជាតិបង់ក្លាដែសប្រមាណជា ២ ០០០ ០០០នាក់បានទទួលសញ្ជាតិឥណ្ឌាដោយខុសច្បាប់ ។ នេះហើយជាហេតុផលដែលបានជំរុញ និងលើកទឹកចិត្តរដ្ឋអំណាចឲ្យធ្វើជំរឿនដើម្បីចង់ដឹងថា តើពលរដ្ឋរូបណាជាជនជាតិឥណ្ឌាដែលមានគ្រួសារជាជនជាតិឥណ្ឌាពិតប្រាកដ ។ ទោះជាយ៉ាងនេះក្តី កុំថាឡើយជនជាតិឥណ្ឌាមានដើមកំណើតបង់ក្លាដែស ឬដើមកំណើតផ្សេង សូម្បីតែជនជាតិឥណ្ឌាពីកំណើតក៏ពិបាករកភស្តុតាងទៅបង្ហាញសញ្ជាតិរបស់ខ្លួនដែរនៅជិត ៥០ឆ្នាំក្រោយមក ។ គ្រួសារអ្នកកាន់សាសនាអ៊ីស្លាមជាជនរងគ្រោះមុនគេនៅក្នុងយុទ្ធនាការជំរឿនពេលនេះ ហើយអ្នកត្រេកត្រអាល គឺក្រុមអ្នកជាតិនិយមហិណ្ឌូដែលកំពុងកាន់អំណាច៕
