សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ចម្ការឈូករ័ត្នមួយកន្លែងដែលមានផ្ទៃដីជាង១ហិកតា ស្ថិតក្នុងភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង ត្រូវបានម្ចាស់ចម្ការដាំផ្កាឈូករ័ត្ននេះ ឡើងក្នុងគោលបំណងដើម្បីស្តាគុណភាពដីឲ្យមានជីវជាតិឡើងវិញ បានប្រែក្លាយជារមណីយដ្ឋានទេសចរណ៍ធម្មជាតិទាក់ទាញប្រជាពលរដ្ឋរស់នៅក្បែរទល់ដែនកម្ពុជា-ថៃ នាំគ្នាមកលេងកម្សាន្ត និងថតផ្តិតរូបភាពជាមួយផ្កាឈូករ័ត្នពណ៌លឿងដ៏ស្រស់ដើម្បីទុកអនុស្សាវរីយ៍ ។
អ្នកនាង កេង សុចិន្តា ម្ចាស់ចម្ការផ្កាឈូករ័ត្ន ប្រាប់ឲ្យដឹងថា ការដាំផ្កាឈូករ័ត្នគឺស្វាមីរបស់នាងរៀនផ្នែកកសិកម្មនៅប្រទេសថៃជាអ្នករៀបចំដាំផ្កានេះឡើងដើម្បីជួយឲ្យដីរបស់នាងដែលមានផ្ទៃដីប្រមាណជាង១ហិកតាមានជីវជាតិក្នុងការដាំដុះដំណាំផ្សេងៗ ។ ដីនោះនាងទើបតែទិញបានដោយខ្វះជីវជាតិដាំដំណាំមិនសូវបានផលនោះទេ ។ ទើបស្វាមីនាងដែលមានជំនាញខាងកសិកម្មទិញគ្រាប់ពូជផ្កាឈូករ័ត្នពីខេត្តឈៀងម៉ៃប្រទេសថៃ១គីឡូក្រាមជិត១០ម៉ឺនរៀល យកមកដាំដុះលើផ្ទៃខាងលើនោះ ។
អ្នកនាង កេង សុចិន្តា បានប្រាប់ឲ្យដឹងថា ការដាំផ្កាឈូករ័ត្ននេះផងដែរមុនដំបូងគ្រាន់តែជាការដាំដើម្បីស្តាគុណភាពដីជាធម្មតាប៉ុណ្ណោះ ។ ក្រោយមកមានប្រជាពលរដ្ឋចេះតែនាំគ្នាមកថតលេងនៅពេលល្ងាចៗកាន់តែច្រើនស្វាមីរបស់នាងក៏បានរៀបចំផែនការដាំផ្កាឈូរ័ត្នសារជាថ្មីដោយដាំជាសួនឲ្យមានជួរត្រឹមត្រូវធ្វើឲ្យកាន់មានការទាក់ទាញប្រជាពលរដ្ឋដែលរស់នៅទល់ដែនកម្ពុជា-ថៃក្នុងខេត្តបាត់ដំបង និងខេត្តបន្ទាយមានជ័យមកលេងកម្សាន្តកាន់តែច្រើនឡើង ។
អ្នកនាង កេង សុចិន្តាប្រាប់ឲ្យដឹងទៀតថា ការដាំផ្កាឈូករ័ត្នគ្មានអ្វីលំបាកនោះឡើយ គ្រាន់តែថែស្មៅ ស្រោចទឹក ឲ្យបានដិតដល់វា និងដុះរីកលូតលាស់ល្អត្រឹមតែរយៈពេល៣ខែប៉ុណ្ណោះវា និងរីកចេញផ្កានោះហើយ ។ ផ្កាឈូករ័ត្នមានអាយុកាលជាង១ខែ និងបាក់កងាប់ជាបណ្តើរៗបង្កក្លាយជាជីតែម្តង ។
អ្នកនាងម្ចាស់ចម្ការក៏បានបង្ហាញគម្រោងដាំផ្កាមួយចំនួនទៀតដើម្បីបំរើលើវិស័យទេសចរណ៍ដោយសារមានការសំណូមពរពីប្រជាពលរដ្ឋឲ្យដាំផ្កាឲ្យបានច្រើនសម្រាប់ពួកគាត់មកលេងកម្សាន្ត ។
ប្រជាពលរដ្ឋដែលមកលេងកម្សាន្តចម្ការឈូករ័ត្ន ខាងលើបានលើកឡើងបង្ហាញពីអារម្មណ៍រីករាយ និងស្រស់ថ្លាក្នុងចិត្តដែលបានមកឃើញផ្កាឈូករ័ត្នដ៏ស្រស់ស្អាត និងថតរូបលេងទុកជាអនុស្សាវរីយ៍ ។ កន្លងមកនៅតាមទល់ដែនកម្ពុជា-ថៃ ជាពិសេសនៅស្រុកសំពៅលូនមិនមានដាំផ្កាជាចម្ការបែបនេះសម្រាប់ឲ្យប្រជាពលរដ្ឋមកលេងកម្សាន្តនោះឡើយ ដោយជាលើកដំបូងបានឃើញពីការដាំផ្កាឈូករ័ត្នជាចម្ការមានអារម្មណ៍ប្លែក និងស្រស់ស្រាយបំផុត ។
ជុំវិញផ្កាឈូករ័ត្ននេះផងដែរ បើយោងតាមការដកស្រង់ពីឯកសារសុខភាពដែលបានចុះផ្សាយតាមសារព័ត៌មានក្នុងស្រុកមួយចំនួនបានបង្ហាញឲ្យដឹងថា គ្រាប់ផ្កាឈូករ័ត្នបានផ្តល់អត្ថប្រយោជន៍ដល់សុខភាពមនុស្សជីវជាតិដែលមានក្នុងគ្រាប់ផ្កាឈូករ័ត្នល្អបំផុតសម្រាប់សុខភាពសក់ និងបេះដូង ។ វាក៏ជួយពង្រឹងដល់ការគេង អារម្មណ៍ល្អ និងភាពអាចមានកូនបានរបស់បុរស ។ អ្វីដែលកាន់តែល្អនោះគឺថា គ្រាប់ផ្កាឈូករ័ត្នត្រូវបានគេចាត់ទុកជាអាហារសម្រន់ដ៏អស្ចារ្យ និងគួរឲ្យឆ្ងាញ់ណាស់ ។ គ្រាប់ធញ្ញជាតិដ៏ឆ្ងាញ់នេះជាប្រភពដ៏ល្អនៃជាតិខ្លាញ់ល្អចំពោះសុខភាព វីតាមីន E វីតាមីន B ស័ង្គសី ផូស្វ័រ ប៉ូតាស្យូម ជាតិដែក កាលស្យូម និងប្រូតេអ៊ីន៕សំ វិច្ឆិកា
