សារព័ត៌មាន នគរវត្ត តែងតែនាំមុខគេជានិច្ច
ក្រុមអ្នកឯកទេសវិភាគបានលើកឡើងថា អាមេរិក មានចេតនា រក្សាកម្តៅ ការប្រឈមដាក់គ្នាទាំងជាមួយប្រទេសអ៊ីរ៉ង់ ក្នុងតំបន់មជ្ឈិមបូព៌ា ក៏ដូចជា កូរ៉េខាងជើង នៅអាស៊ីខាងកើត ដើម្បីសម្រេចគោលដៅយោធា និងផលប្រយោជន៍របស់អាមេរិកនៅទីនោះ ។
ប្រសិនបើអាមេរិកបញ្ចប់ការប្រឈមមុខតានតឹងជាមួយអ៊ីរ៉ង អាមេរិកមិនអាចលក់អាំវុធទៅឲ្យបណ្តាប្រទេស អារ៉ាប់នោះឡើយ ក៏ដូចជាសម្រេច គោលដៅគ្រប់គ្រងអណ្តូងប្រេងនៅទីនោះ ។ ដោយឡែកនៅក្នុងប្រទេសកូរ៉េខាងជើង ក៏ដូច្នេះដែរ អាមេរិក មានចេតនាយ៉ាងច្បាស់ ក្នុងការរក្សាស្ថានភាពប្រឈមមុខដាក់គ្នា បើទោះបីអាមេរិក បានដឹងថា ទាំងអ៊ីរ៉ង់ និងកូរ៉េខាងចង់បញ្ចប់ក៏ដោយ ។
ជាមួយគ្នានេះដែរអង្គការសហប្រជាជាតិកំពុងតាមដានសំណុំរឿងកូរ៉ខាងជើងយ៉ាងប្រុងប្រយ័ត្នបំផុត ។ ស្ថានភាពហាក់កំពុងលេចសញ្ញាមិនល្អ កាន់តែច្រើនឡើងៗ ក្តីសង្ឃឹមថា និងឃើញវ៉ាស៊ីនតោន និងព្យុងយ៉ាង ជួបចរចាគ្នា បន្តពីអ្វីដែលបានចាប់ផ្តើមនៅសិង្ហបុរី កាលពីខែមិថុនាឆ្នាំ ២០១៨ ទំនងជារលត់ឈឹងត្រឹមថ្ងៃទី ៣១ធ្នូខាងមុខនេះហើយ ។
កាលពីថ្ងៃទី៥ខែធ្នូ ក្រុម៦ប្រទេសរបស់សហភាពអឺរ៉ុបនៅក្រុមប្រឹក្សាសន្តិសុខអង្គការសហប្រជាជាតិ បានចេញសេចក្តីថ្លែងការណ៍ថ្កោលទោសសកម្មភាពផ្គើនរបស់កូរ៉េខាងជើង ដែលទើបបានបាញ់សាកល្បងមីស៊ីលជាថ្មី តរដឹកគម្រប់លើកទី ១៣ គិតចាប់តាំងពីខែឧសភា ដល់ថ្ងៃទី ២៨ វិច្ឆិកា ។
សម្រាប់អឺរ៉ុប វាជាការចាំបាច់ដែលក្រុមប្រឹក្សាសន្តិសុខអង្គការសហប្រជាជាតិត្រូវធានាឲ្យបានមធ្យ័តនូវការអនុវត្តតាមសេចក្តីសម្រេចរបស់ខ្លួន និងការអនុវត្តទណ្ឌកម្ម លើកូរ៉េខាងជើង ដូចដែលក្រុមប្រឹក្សាបានសម្រេចជាឯកច្ឆ័ន្ទ ។
តាំងពីខែឧសភាមក ក្រោយការបាញ់សាកល្បងមីស៊ីលរបស់ព្យុងយ៉ាង អឺរ៉ុប បានទាមទារ យ៉ាងទៀងទាត់ ឲ្យក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំស្តីពីកូរ៉េខាងជើង និងរាល់លើក ក្រុមប្រឹក្សាបានចេញថ្លែងការណ៍រួមថ្កោលទោស ព្រោះ តាមសេចក្តីសម្រេចអង្គការសហប្រជាជាតិ ព្យុងយ៉ាងគ្មានសិទ្ធិសាកល្បងមីស៊ីលឡើយ ។
កូរ៉េខាងជើងនៅក្នុងសប្ដាហ៍នេះបាននិយាយថា ខ្លួន និងបញ្ជូនកញ្ចប់កាដូមួយសម្រាប់ថ្ងៃបុណ្យណូអែល ឲ្យសហរដ្ឋអាមេរិក ខណៈក្រុមអ្នកជំនាញយល់ថា អំណោយអ្វីឲ្យប្រាកដនៅក្នុងកញ្ចប់កាដូ គឺវាអាស្រ័យទៅលើថាតើលោក ដូណាល់ ត្រាំ និងធ្វើឲ្យលោក គីម ជុងអ៊ុន សប្បាយចិត្ត ឬខូចចិត្តនៅមុនចុងឆ្នាំ២០១៩ នេះប៉ុណ្ណោះ ហើយវាក៏ជាក៏អាចជាការបញ្ឆេះកម្តៅ នៅឧបទ្វីបកូរ៉េឡើងវិញផងដែរ ។
លោក រី ថែសុង (Ri Thae Song) ជាអនុរដ្ឋមន្ត្រីទីមួយនៃក្រសួងការបរទេសកូរ៉េខាងជើង ទទួលបន្ទុកកិច្ចការអាមេរិក គឺជាអ្នកបង្ហើបដំបូងគេពីកញ្ចប់កាដូ ដែលត្រូវផ្ញើឲ្យសហរដ្ឋអាមេរិកនៅក្នុងសេចក្ដីថ្លែងការណ៍មួយ ចេញផ្សាយដោយប្រព័ន្ធផ្សព្វផ្សាយរដ្ឋនៅសប្ដាហ៍នេះ ។ តែព្រមពេលជាមួយគ្នាលោក Song បានចោទប្រកាន់ថា រដ្ឋបាលលោក ដូណាល់ ត្រាំ កំពុងប្រើប្រាស់កិច្ចចរចារំសាយអាវុធនុយក្លេអ៊ែរជាមួយកូរ៉េខាងជើង ជាឧបករណ៍ដើម្បីកេងចំណេញ ផលប្រយោជន៍នយោបាយនៅក្នុងស្រុក ។ លោកបន្ថែមថា អំណោយក្នុងកញ្ចប់កាដូបុណ្យណូអែល គឺសហរដ្ឋអាមេរិកខ្លួនឯងជាអ្នកជ្រើសរើស ។
ការលើកឡើងរបស់លោក Ri Thae Song ត្រូវបានក្រុមអ្នកជំនាញមួយចំនួនបកស្រាយថា គឺជាសញ្ញាមួយបង្ហាញថា កូរ៉េខាងជើងទំនងជាអាច និងចាប់ផ្ដើមការបាញ់សាកល្បងមីស៊ីលបាលិស្ទីគអន្តរទ្វីប (ICBM) ឡើងវិញ ស្របពេលកាលកំណត់ត្រឹមនៅចុងឆ្នាំ២០១៩ ដែលលោក គីម ជុងអ៊ុន ដាក់ឲ្យលោក ដូណាល់ ត្រាំ ស្ដារកិច្ចចរចានុយក្លេអ៊ែរ នៅសល់តែប៉ុន្មានសប្ដាហ៍ទៀតប៉ុណ្ណោះ ។
កាលពីឆ្នាំ២០១៧ កូរ៉េខាងជើងធ្លាប់បានអះអាងម្ដងរួចមកហើយថា ការបាញ់សាកល្បងជាលើកដំបូងនូវមីស៊ីលបាលិស្ទីគអន្តរទ្វីប (ICBM) របស់ខ្លួនជាកាដូមួយ សម្រាប់ទីក្រុងវ៉ាស៊ីនតោន នាឱកាសបុណ្យឯករាជ្យជាតិអាមេរិកថ្ងៃទី០៤ ខែកក្កដា ។
បន្ថែមពីលើនេះ ការសន្និដ្ឋានជុំវិញការធ្វើតេស្ដមីស៊ីលប្រភេទនេះឡើងវិញ បានកើតមានជាថ្មីបន្ទាប់ពីប្រព័ន្ធផ្សព្វផ្សាយរដ្ឋកូរ៉េខាងជើង កាលពីថ្ងៃពុធម្សិលមិញបានបង្ហោះរូបភាពជាច្រើនសន្លឹករបស់លោក គីម ជុងអ៊ុន ជិះសេះសកម្សាន្តនៅលើភ្នំ ផេកទូ (Paektu) ជាលើកទី ៣ ដែលជាប្រថ្នូលថា និងមានការសម្រេចចិត្តធំមួយ និងត្រូវធ្វើឡើងក្នុងពេលឆាប់ៗនេះ ។ ជាក់ស្ដែង កាលពីខែតុលាកន្លងទៅ ទីក្រុងព្យុងយ៉ាបាញ់មីស៊ីលរយៈចំងាយខ្លីជាបន្តបន្ទាប់ ក្រោយលោក គីម ជិះសេះសកម្សាន្តនៅលើភ្នំដ៏ពិសិដ្ឋ សម្រាប់ប្រជាជនកូរ៉េខាងជើមួយនេះ ។
ជុំវិញបញ្ហខាងលើនេះ លោកស្រី ឌូយុន គីម (Duyeon Kim) ជាទីប្រឹក្សាជាន់ខ្ពស់ម្នាក់លើកិច្ចការអាស៊ីភាគឦសាន និងគោលនយោបាយនុយក្លេអ៊ែរ នៃអង្គការក្រៅរដ្ឋ International Crisis Group បានបង្ហាញការយល់ឃើញថា អំណោយនៅក្នុងកញ្ចប់កាដូបុណ្យណូអែលរបស់កូរ៉េខាងជើង គឺវាអាស្រ័យថាតើលោក ត្រាំ អាច និងធ្វើឲ្យលោក គីម សប្បាយចិត្ត ឬខូចចិត្តនៅមុនចុងឆ្នាំនេះ ។ ពោលបើលោក ត្រាំ ផ្ដល់សម្បទានបន្ថែមណាមួយ ឬបើកកិច្ចចរចាជាថ្មីជាមួយកូរ៉េខាងជើង ឲ្យបានមុនកាលកំណត់ត្រឹមចុងឆ្នាំ ដែលលោក គីម ជាអ្នកកំណត់ នោះស្ថានការណ៍អាច និងល្អប្រសើរមួយរយៈតាមហ្នឹងដែរ៕
