សារព័ត៌មាន នគរវត្ត តែងតែនាំមុខគេជានិច្ច
ចំឡើយច្រើនលើកច្រើនសាររបស់មន្ត្រីគយពាក់ព័ន្ធនឹងបញ្ហាសំរាម៨៣កុងតឺន័រយកមកទុកចោលនៅក្រុងព្រះសីហនុ ប៉ុន្មានថ្ងៃកន្លងមកនោះ ធ្វើឲ្យប្រជាពលរដ្ឋវិលវល់ ដែលម្តងលោកមេគយថា ជាក្រុមហ៊ុនរបស់ចិន ប៉ុន្តែនៅពេលមន្ត្រីស្ថានទូតចិនបដិសេធ លោកគយប្រាប់ថា ជាក្រុមហ៊ុនរបស់ខ្មែរ ដែលមានចិនធ្វើការនៅក្នុងនោះ (Sic) ។ ហ៊ឺម… បើគ្រាន់តែក្រុមហ៊ុនណាមួយឲ្យច្បាស់លាស់ ក៏មិនប្រាកដនោះ តើឲ្យរាស្ត្រខ្មែរជាង១៥លាននាក់ រំពឹងលើលោកគយយ៉ាងដូចម្តេច? ពិតហើយ គឺក្រុមហ៊ុន ជុងយៀន ប្លាស្ទិក (Chung Yuen) ដែលមានថៅកែជាជនជាតិខ្មែរ ។ យ៉ាងណាក៏ដោយ ក្រុមហ៊ុនណាមួយនោះមិនសំខាន់ ដែលរាស្ត្រខ្មែរចង់ដឹងនោះទេ ប៉ុន្តែថាតើ ការប្តេជ្ញាចិត្តរបស់មន្ត្រីគយថា នឹងនាំសំណល់ប្លាស្ទិកទាំងនោះទៅប្រទេសដើមវិញ ឲ្យខាងតែបាន តើអាចទៅរួចទេ?
រាស្ត្រខ្មែរចង់ដឹងថា តើវាស៊ីពេលប៉ុន្មានក្នុងការរៀបចំបែបបទសំណុំឯកសារនាំសំរាមទាំង១៦០០តោនទៅប្រទេសប្រភពដើមវិញនោះ (កាណាដា និងអាមេរិក) ។ ទៅរួចទេ ដែលថា ការសន្យានោះអាចនឹងទទួលបានលទ្ធផលវិជ្ជមាន ហើយប្រទេសដើមអាចទទួលយកសំណល់របស់ខ្លួនវិញនោះ? រឿងរ៉ាវនេះ ហាក់ដូចជាច្របល់ខ្លាំងនៅក្នុងចំណោមមន្ត្រីអ្នកអនុវត្តច្បាប់ ជាពិសេសមន្ត្រីគយ ដែលធ្វើកិច្ចការនេះ ។ ចំឡើយមិនស្របគ្នាក្នុងរឿងនេះ ធ្វើឲ្យប្រជារាស្ត្រយល់ច្រឡំចំពោះការទទួលខុសត្រូវក្នុងនាមខ្លួនជាសមត្ថកិច្ច ។ យ៉ាងណាក៏ដោយ មន្ត្រីគយបានអះអាងដោយខ្លួនឯងថា វាជាជោគជ័យដែលអាចរកឃើញសំរាម៨៣កុងតឺន័រ ឬជាង១៦០០តោននៅកំពង់ផែក្រុងព្រះសីហនុ មុនពេលដែលគេដឹកយកទៅបោះចោលនៅព្រះរាជាណាចក្រកម្ពុជា? សម្រាប់រាស្ត្រខ្មែរដែលមានការអប់រំតិចតួច នៅតែឆ្ងល់ថា ហេតុអ្វីបានជានៅក្នុងឯកសារ និងការពិតខុសគ្នាយ៉ាងដូច្នេះ? តើនាពេលកន្លងមក មានការបន្លំដូចករណីសំរាមទាំង៨៣កុងតឺន័រនេះដែរឬទេ? ការដែលមន្ត្រីគយដាក់ការសង្ស័យ ហើយព្យាយាមគាស់ទូកុងតឺន័រមើលនោះ វាជាជោគជ័យមួយ ប៉ុន្តែ បើដឹងតាំងពីមុនមក ក៏ល្អម្យ៉ាងដែរ ។
សម្រាប់ប្រជាពលរដ្ឋនៅតែឆ្ងល់ថា ហេតុអ្វីបានជាមានភាពខុសគ្នារវាងឯកសាររត់ការ និងផលិតផលជាក់ស្តែង? ប្រសិនបើនៅក្នុងឯកសារ គេដាក់ជាផលិតផល
សម្រាប់ប្រើប្រាស់ ឬគ្រឿងសំអាង ប៉ុន្តែជាក់ស្តែង វាជាគ្រឿងញៀនទៅវិញនោះ នឹងទៅជាយ៉ាងណា? រាស្ត្រខ្មែរនៅតែឆ្ងល់ថា តើអាចថា ជាការឃុបឃិតគ្នារវាងក្រុមមន្ត្រីណាមួយជាមួយនឹងក្រុមហ៊ុនឯកជនដែលមានប្រភពនៅស្រុកខ្មែរនេះដែរឬទេ? ពីព្រោះថា ចាប់តាំងពីមានរឿងនេះមក ស្ថាប័នគយហាក់ដូចជាមិនទាន់បញ្ជាក់អំពីភាពច្បាស់លាស់ ក្នុងការទទួលខុសត្រូវលើបញ្ហានេះនៅឡើយ ។ វាជាភាពអាម៉ាសដែលដំបូងឡើយ គេមិនដឹងសូម្បីប្រភពសំរាមទាំង៨៣កុងតឺន័រនោះមកពីណា ហើយមិនដឹងឈ្មោះក្រុមហ៊ុននោះទៅទៀត ។ ឆ្លងតាមការស្រាវជ្រាវយ៉ាងយកចិត្តទុកដាក់ គេរកឃើញថា សំរាមទាំងនោះត្រូវបាននាំមកពីប្រទេសកាណាដា និងសហរដ្ឋអាមេរិក តាមរយៈក្រុមហ៊ុនចិន ។ ប៉ុន្តែឥឡូវនេះ មេគយអះអាងថា មិនមែនក្រុមហ៊ុនចិនទេ គឺក្រុមហ៊ុនខ្មែរដែលមានជនជាតិចិនធ្វើការនៅក្នុងនោះ ។
យ៉ាងណាក៏ដោយ រាស្ត្រខ្មែរនៅតែចង់ឲ្យប្រមុខរាជរដ្ឋាភិបាលចាត់វិធានការរកមុខអ្នកទទួលខុសត្រូវ ឬនិយាយឲ្យខ្លីងាយយល់ រាស្ត្រចង់ដឹងថា តើនរណាស៊ីញ៉េឲ្យទំនិញ៨៣កុងតឺន័រនេះនាំចូល បើទោះបីជាមិនដឹងថា ជាសំរាម ឬក៏ផលិតផលកែច្នៃយ៉ាងណាក៏ដោយនោះ ។ ប្រសិនបើរកឃើញថា អ្នកចុះហត្ថលេខាឲ្យគេនាំទំនិញទាំង៨៣កុងតឺន័រនេះចូលហើយ តើអាជ្ញាធរមានសមត្ថកិច្ច ក៏ដូចជាស្ថាប័នជំនាញ អាចដាក់ការទទួលខុសត្រូវចំពោះមន្ត្រីនោះបានដែរឬទេ? នេះគេហៅថា មានចំណែកខ្លះនៃការទទួលខុសត្រូវ? កុំឲ្យនាំចូលសំរាម៨៣កុងតឺន័រហើយ គ្មានអ្នកទទួលខុសត្រូវយ៉ាងនេះ ។ ប្រជារាស្ត្រខ្មែរសព្វថ្ងៃ មានការចេះដឹងខ្លះដែរ ដូច្នេះ ការដែលសមត្ថកិច្ច ជាពិសេសគយរុញបញ្ហាចុះឡើង វាមិនមែនជាដំណោះស្រាយនោះទេ ផ្ទុយទៅវិញ អ្នកដែលធ្វើគឺហ៊ានទទួលខុសត្រូវខ្លះផង ។ ការទទួលខុសត្រូវមិនមែនមានតែខាងក្រុមហ៊ុននោះទេ ប៉ុន្តែមន្ត្រីដែលចុះហត្ថលេខាឲ្យគេនាំសំរាមទាំង៨៣កុងតឺន័រចូលនោះ ក៏ជាអ្នកទទួលខុសត្រូវមុនគេផងដែរ ។
សម្រាប់រាស្ត្រខ្មែរអ្វីដែលចង់បាននោះ គឺសំរាមទាំងនោះត្រូវបាននាំចេញត្រឡប់ទៅវិញ ឲ្យបានយ៉ាងឆាប់បំផុត តាមតែអាចធ្វើទៅបាន ។ ហេតុអ្វីបានជាមន្ត្រីគយត្រូវរង់ចាំពេលវេលា ជួបជាមួយក្រុមហ៊ុនរហូតដល់ដើមសប្តាហ៍ក្រោយ? នីតិវិធីត្រូវចំណាយពេលប៉ុន្មានសប្តាហ៍ ដើម្បីអាចឲ្យក្រុមហ៊ុននោះនាំសំរាមទាំងនេះត្រឡប់ទៅវិញ? តើប្រាកដឬទេ ដែលថាក្រុមហ៊ុននោះអាចនឹងនាំសំរាមទាំង១៦០០តោន ចេញពីកម្ពុជា? ដោយមិនបាច់វែកញែករកអ្នកទទួលខុសត្រូវ ក្នុងរឿងដដែលៗនេះ តើសំណុំរឿងសំរាមបែបនេះ នឹងត្រូវបញ្ឈប់បានដែរឬទេ? ប្រមុខរាជរដ្ឋាភិបាលបានបញ្ជាក់ជាញយដងហើយថា កម្ពុជាមិនមែនជាទីលានចាក់សំរាមនោះឡើយ ។ សម្រាប់ប្រជាពលរដ្ឋខ្មែរវិញ សំរាមមិនមែនជានំបុ័ងសាច់សម្រាប់ចែករំលែកគ្នាទទួលទាននោះទេ បើទោះបីជាវា ជាសាច់ជ្រូកបីជាន់សម្រាប់ពួកមន្ត្រីពុករលួយមួយចំនួនណានោះក៏ដោយ ៕
